"Fixemos os libros de FP porque non os había en galego"

O Grupo Academia Postal é a principal empresa privada dedicada ao ensino de FP e preparación de funcionarios de Galicia. A compañía ourensá factura máis de 6 millóns de euros ao ano, emprega a 163 profesores do cadro de persoal (e 210 mestres colaboradores) e dá clase a 7.000 alumnos. Dispón de nove academias, sete delas en Galicia, unha en Oporto e outra en Valladolid.

Pero o verdadeiro tesouro económico da compañía é unha editorial propia que xa ten no mercado 150 libros de texto en galego, de tódalas materias (tecnoloxía, dereito, economía, historia). "Hai oito anos empezamos a editar os libros en galego porque nos decatamos de que non os había no mercado. Agora somos unha das tres empresas editoriais homologadas para dar cobertura ao bachelerato e á formación profesional", explica Francisco Novoa, responsable da empresa. A Academia é, seguramente, Postal, porque o seu director foi durante moitos anos o xefe provincial de Correos en Ourense.

"No 2004 fixemos un plano estratéxico para galeguizar completamente ao Grupo Academia Postal. Vainos ven. Eu non creo que gañemos máis por usar o galego. Mais penso que tampouco gañamos menos. Para min, o importante é que gañamos todos", opina Novoa.

Da factoría de formación da Academia Postal teñen saído promocións enteiras de opositores á Xunta e máis aos concellos galegos, o que converteu a esta empresa na principal formadora do funcionariado galego.

"Escollemos esta liña de traballo por vocación e porque cremos que é o mellor modo de combater a desafección do galego. A verdade é que ás veces temos recompensas", expón Novoa.