"Sinonimoen kutxa" hiztegia kaleratuko du datorren astean Elhuyar elkarteak

Jon Urrujulegik egina eta Elhuyar elkarteak argitaratuta, Sinonimoen kutxa, sinonimo eta antonimoen hiztegia, kaleratuko da datorren astean. Hiztegi honen arduradunen arabera, "terminoen arteko kidetasuna azaltzeaz gain, zehaztu nahi den ideia areago finkatzeko hitz zehatza edo antzekoa eskaintzen du hiztegi honek, eta, askotan, baita aurkakoa ere, antonimoa". Sinonimoen kutxa-k, guztira, 21.416 sarrera jasotzen ditu, ia 60 mila sinonimo eta zortzi mila antonimo pasatxo. Elhuyarreko ordezkarien ustez, euskara aberastu eta euskaraz ongi idatzi nahi izanez gero, "tresna oso erabilgarria" izango da.Aste honetan, berriz, Sinonimoen hiztegia aurkeztu dute UZEI eta Elkarlanean-ek. Guztira, 23.285 sarrera ditu hiztegi honek, eta berehala CD-Romean eta idazteko programa informatikoetan ere kaleratuko dute. Hiztegia ia urtebeteko lanaren emaitza da eta bertan, bost pertsona aritu dira, lau hizkuntzalari eta informatiko bat. Miriam Urkia,lan taldeko kidearen ustez, "hutsunea betetzera dator, era honetako aurreko hiztegia duela hamaika urte atera baitzen". Sinonimoen hiztegia-n hitz bakoitzari hainbat informazio erantsi zaio, "zein kategoria gramatikal duen, zein euskalkikoa den edo zein erabilera marka duen, esaterako".