O desembarco de Ferrín na academia
"Temos pendente unha recuperación masiva dos apelidos galegos", afirma o novo presidente da Real Academia Galega
O novo presidente da Real Academia Galega deseña un futuro inmediato ao servizo das palabras. "O máis necesario é culminar un diccionario numeroso e grande, á altura do noso tempo, e elaborar unha gramática normativa", expón Xosé Luís Méndez Ferrín nunha entrevista que se publicará mañá nas páxinas de Luces. Ademais, Ferrín manifesta a súa intención de que os académicos disidentes, Xesús Alonso Montero e Xosé Luís Franco Grande, se reincorporen "plenamente" á vida da institución. "Xa fixeron valiosas contribucións á análise crítica do decreto sobre as linguas da Xunta", revela.
Pero Méndez Ferrín, o escritor vivo de maior calado crítico, deberá manexar o Plenario da rúa Tabernas sometido á precariedade económica que condiciona a vida da Academia dende as súas orixes. "Precisamos un apartado nos Orzamentos, cun diñeiro público e transparente", explica.