Abenturazale hutsa
Eva Garcés donostiarraren ustez, beste zenbait herrialdeetako egoerarekin alderatuz, Euskal Herri osoan komikia ez da behar bezala baloratzen. "Zoritxarrez, duintasunik ez duen lanbidea da", dio berak, euskal egile gazte bat baino gehiagok Frantziara joan behar izana "guztiz tamalgarria" dela gaineratzen duen bitartean. "Aldizkariren batean gure komikiren bat kaleratu arren, normalean ez dugu ezer kobratzen. Komikiaz bizi nahi izanez gero, erromantiko eta abenturazale hutsa izan behar duzu. Beste erremediorik ez dago".Bere esanetan, merkatu eta irakurle falta ez dira Euskal Herrian komikiaren arloak dituen gaitz guztien errudunak. "Nire ustez, askok arte txiki baten modura dute komikia, eta oker dabiltza. Zinean edo eleberrietan bezala, hemen ere istorioak kontatzen dira". Irtenbideen inguruan galde egiterakoan, hauxe da Evaren erantzuna: "Agian, gutaz barre gehiago egitea da falta zaiguna".
