Lehen mailako beharrak nahasteak gehiegi gastatzera bultza dezake

"Kontsumo arloan erreklamazio gehiago egiten ez bada informazio baliagarririk ez dagoelako da. Informazioak gainezka egiten du gure gizarte honetan; hori dena, baina, alferrekoa da". Hala dio Berta Garcia Euskadiko Kontsumitzailen Elkarteko kideak. Halere ere informazioa izateak ez gaitu gehiegikerietatik babesten, "gehiegikeriak nonahi ematen dira, eta denentzat dago". Gehiegikeria gehienak banketxe, aseguru-etxe eta eta bidaia agentzietan gertatzen omen dira. Erreklamazio gutxi heltzen da epaitegietara, jendeak ez baitu gustuko bide hori. Kontsumitzaile txarrik eta onik ez dago eta muga oso malgua izan daiteke. "Gizarte garatuetan beharrizanaren kontzeptua oso zabala da, muga zehatzik ez du. Esaterako, guk telefonoa ezinbestekoa dugu, eta azpigaratutako gizarteetan ez da horrela izaten, lehen mailako beharrizanak osterantzekoak direlako. Gure "behar" horrek sarritan gure errealitate ekonomikotik gora bizitzera garamatza, eta hortaz, kontsumo onak eta txarrak mugarik balute norberaren gaitasun ekonomikoa litzateke". Kontsumoaz jarduten duen patologia ere badago, "psikiatra eta psikologoen eskuetan daude asko. Bestelako arazoak konpontzeko, jendeak erostera jotzen du eta lehendik zituzten arazoak samurtu baino gehitu egiten zaizkie". Kontsumoak mugarri asko ditu eta beraietako asko ilun samarrak izan daitezke, "ekologia eta kontsumo arduratsuan jazotzen dena, batzuk aipatzearren. Esplotazioa ikaragarria da zenbait arlotan, eta azken boladatan horri aurre egiteko produktu batzuk ez kontsumitzeko hainbat ahots goratu da". Garcíaren esanetan, "etenik ez duen ahotsa" da kontsumitzaileen aldeko lana.