GAIAK

Eremu txikiko hizkuntzen ebaluazioa aztertuko dute Bilbon

Hizkuntz gaitasunaren egiaztapenak gero eta garrantzi handiagoa du Europan. Mugen desagerpenak hizkuntzen ezagupena erakusteko tresna baliagarri eta homologatuen beharra sortu du. Beste horrenbeste gertatzen da hizkuntza gutxituekin.

Hain zuzen ere, eremu txikiko hizkuntzen ebaluazioa izan dute aztergai Europako Hizkuntz Ebaluatzaileen Elkarteko (ALTE) kideek aste honetan Bilbon egin duten bileran. Bertan, Europako 24 hizkuntzaren 28 erakundetako ordezkariak elkartu dira ALTEko arduradun Jon Simon Gartziak azaldu duen helburua bete nahian. "Ideia nagusia da hizkuntza guztiak ALTE ebaluazio sistema europarrarekin egokitzea. Orain aztergai nagusia hizkuntza gutxituak izan badira ere, ALTEren helburua horixe baita", zehaztu du.

Gaitasun maila komunak finkatzea ezinbesteko baldintza da hizkuntz ziurtagiriak Europa osoan onartuak izan daitezen. Horrez gain, hizkuntza guztientzako eredu orokorrak sortu nahi dituzte, hizkuntza bakoitzari buruzko ezagupenaren ebaluazio prozesuan erabiltzeko.

Helburu horrekin, ALTEko kideek sei urratsetan banatutako maila eredua diseinatu dute, egun egiten diren azterketa mota guztiak bere baitan hartzen dituena.

Euskarari dagokionez, orain arte diseinatu den proba bakarra -EGA azterketa- bosgarren mailan sailkaturik dago, Ingelesezko Advanced edo frantsesezko Diplomarik Gorenaren parean. Sailkapen horrek eraginkortasun handiz komunikatzeko gaitasuna neurtzen du, egokitzapen maila, errejistroarekiko sentiberatasuna eta gai ezezagunetara egokitzeko gaitasuna aintzat hartuz.

Azterketa berria

Horrez gain, Eusko Jaurlaritzako Hezkuntza Saila derrigorrezko hezkuntza bukatzen duten 16 urteko gazteei zuzendutako azterketa baten diseinuan ari da lanean. Lan hori aurrera eramateko ALTEk finkatutako irizpideak jarraitzen ari dira, erakunde horren sailkapen mailan sartzeko helburuarekin. Ebaluazio horren arabera, laugarren mailan kokatuko litzateke azterketa berria, ingelesezko First Certificate eta espainierazko maila ertaineko ziurtagiriaren parean.

Anjeles Iztueta buru duen saila buru belarri ari da proiektu honetan lanean eta hala adierazi zuen sailburuak berak bileraren atariko ekitaldian. "Oso garrantzitsua da zenbat euskara dakigun neurtu ahal izatea, honela hizkuntza ikasi eta gure hezkuntza eskaintza hobetu ahal izateko. Europako ebaluazio eredua ekimen positiboa da eta guztion artean eratu behar dugu herrien Europaren alde lan egiteko, are gehiago euskara bezalako hizkuntza baten ikuspegitik, Europako zaharrena baita".

* Este artículo apareció en la edición impresa del sábado, 13 de noviembre de 2004.

Archivado En:

Te puede interesar

Lo más visto en...

Top 50