Bere alorrean bakarra

Datorren ostegunean Lekeitiok ateak irekiko dizkio zazpigarren artea deritzonari, eta larunbata bitartean, euskal zinegile zein bideogileen hamaika lanez disfrutatzeko parada izango dute bertara hurbiltzen direnek. 1978. urteaz geroztik ez du hutsik egin eta aurtengoan, gainera, ospatzeko aitzakia badute antolatzaile zein zaleek, 25. urteurrenean.

Mende laurdena euskarazko zinearen zerbitzura, Lekeitioko Bilera, euskarazko zine amateurra bultzatzeko sortu zen. Aipatu bezala, 70. hamarkadaren bukaeran sortutako hau, ez zen garaian jaialdi bakarra, Zestoak ere antolatzen baitzituen Topaketak. Ez luzarorako, baina. Horrela, gaur egun eta hogeita bost urteko eskarmentuz, Lekeitiokoa da ezaugarri hauek dituen Bilera bakarra Euskal Herrian. Benito Anzola bikarioari eman behar eskerrak, bere babesean sortutako zaletu taldeak jarri baitzuen abian I. Euskal Zine Amateur Bilera proiektua.

Talde honen xedea euskaraz egindako pelikulak plazaratzea zen, eta egun, helburu horri eusten diote antolatzaileek beti ere zine amateurraren aldeko jarrera erakutsiz. Garapenak aldaketak ekarri dizkio jaialdiari, dena den. Besteak beste, 1978an Lekeitioko Bilera sortu berria pelikulak erakusteko gunea besterik ez zen, edizio zenbaiten ostean, ordea, lehiaketa bihurtu zuten. Lehenbiziko ekitaldietan zine lanak soilik ikusteko parada zuten zaleek eta hala jarraitu zuen bideoa zabaldu zen arte. Antolatzaileek ez zioten muzin egin euskarri berriari. Sasoiko Antzoki zinemak utzi gintuen, eta bere ordez jarritako kirol kantxak ere. Euskal zinearen kabi bihurtu dute hiru egunez Ikusgarri aretoa eta bertan burutuko dira saio guztiak. Garai berrien magalean, Lekeitiokoa jaialdi garrantzitsua bihurtu da, dudarik gabe, zinegile euskaldunen erreferente.

Jose Luis De la Torre jaialdiko sortzaile eta arduradunak azaldu duenez, lehen edizioko helburu berbera mantentzen saiatzen dira, alegia, euskara ikus-entzunezko medioen artean zabaltzea, "kontuan izan, orain 25 urte, ikus-entzunezkoan, gaztelania zela nagusi eta euskarazko lanak ikustea zaila zela erabat. Egun normalizatuago dago baina oraindik lan asko egin beharrean gaude". Aurkezten diren lanen kalitatea ere goraipatu du De la Torrek, "azken bost urteetan nabarmen aldatu da laburren kalitatea, geroz eta zailagoa da aurkezten diren lanen aukeraketa egitea, profesional zein zine eskoletako partaideek aberastu egin dute eskaintza. Aldaketa garrantzitsua ere nabaritu dugu zinegileen artean, lanak egun euskarazko mentalitatearekin eginak daude". Lekeitioko jaialdiak geroz eta ikusle gehiago biltzen ditu urtero. De la Torre-ren aburuz, herriko jendeari eman beharreko eskerrak dira, "herritarrek bizitasunez bizitzen dute Bilera, urtero jendetza mordoa biltzen du ekitaldiak, eta horrez gain, lanen kalitateak ere zaletuak erakarri ditu zine ospakizun honetara". Aurten gainera, 25. urteurrena ospatu asmoz, antolatzaileek, aurkezten diren lanak internet bidez ikusteko aukera abian jartzea nahi izan dute "gure xedea zinegile partehartzaileen lanak eskura izatea izan da, batez ere ekoiztetxeei begira egindako ahalegina. Aldizkari berezi bat ere kaleratuko dugu, Zine eta Bideo Bileraren historia biltzen duen liburuxka, eta horrez gain aretora sartzeko parada izan ez dutenek, laburrak, Isidro Salinas enparantzan jarritako pantaila erraldoi batean ikusteko aukera izango dute".