Ultra-komunikatzen Anestesiaren azkena
Rock gogorra esamoldea sistemaz musika heavyaz hitz egiteko erabili ohi da. Dena den, tankera horietako adierazgarriek ezin dute ez gogortasunean ezta gordintasunean ere Anestesia bezalako taldeekin leia egin; Anestesiak hardcore eta metala erabiliaz egiten bai ditu doinuak, eztarriko ahotsez indartzen dituen doinuak.
Esan Ozenki Records disko etxeak kaleratu duen Ultra-Komunikatzen diskoan Anestesiaren aipaturiko oinarrizko ezaugarri horiek ez dira aldatzen.
Hauxe da Gipuzkoako talde honek, laukote honek, bi urteko atsedenaldiaren ondoren kaleratu duen laugarren diskoa, Atxantatutako kantariaren partaidetza duena.
Doinua kontutan hartuta, ondo aritzen dira Anestesiakoak thrasha jotzen eta gitarra elektrikoak duen boterean ondo sinesten duela garbi utzi du taldeak euskaraz abestutako kanten bidez. Hamabi dira Ultra-komunikatzen diskoak bildu dituen kantak. Letrari begiratuta honako hau esan behar: pentsaera bakarrari aurre egiteko iritzi anitzen aldeko apustua egiten duela. Alor metaforikoa ere jorratzen du buruentzako kartzelak daudela dioenean eta indibidualismoaren aldeko defentsa egin ere egiten du, egun gizartean gizabanakoa zenbaki bat besterik ez dela esanez.
Horrezaz gain, Hollywoodeko zine industriak propaganda moduan aritzeko duen indarra aipatzen du, eta diskoaren azalak berak honi buruzko aipamena egiten du, azalak gizakiak jasan dezaken manipulazioari aipamena egiten baitio.
Diskoaren azalean giza buru bat ageri da. Buruari lotuta kable ugari.
