Economía e literatura sucia

- "ANDA DE AÍ, GAITEIRO!", "gaiteirada", son voces cargadas de menosprezo tan vivas na nosa xente. O músico popular chegou a nós desprestixiado, como o mundo do que sae, o mundo do pobo.

- AFOUTEZA: O Xurxo Souto recuperou para todos a voz "gaiteiro" como saúdo orgulloso a alguén que ten mérito. Tamén vexo convocada nun cartaz unha "gaiteirada" reivindicativa para lembrar aos tres veciños do Eixo presos. Hai unha nova xerazón que é gaiteira, non ten complexos e é afouta. Ben, moi ben.

- AMY WINEHOUSE canta tan ben, mais é tan brava que se destrúe. Leva no apelido, "casa do viño", esa chamada á bebedela. Amy, bebe con sentido. Ou é perder o sentido o que procuras?

- A ECONOMÍA ÉLLES LITERATURA. Unha das leccións desta crise é que a economía non era ciencia empírica. Realmente pertence ao campo das humanidades e ten a ver coa historia, a antropoloxía, os mitos, a astroloxía... É literatura ilustrada con números, ciencia ficción.

- ECONOMISTAS, son vostedes poetas (non está mal).

- SE NON TIVESE GAÑADO OBAMA... Se os norteamericanos optasen por reivindicar a súa política destes anos pasados sería sumirense eles na vergoña, sería tamén unha onda de desesperanza polo mundo (aínda que non gostemos de dicilo; nós, os europeos, os listos. Tan autosuficientes).

- E, DESAPARECIDO O MARXISMO NA HISTORIA, volta o Marx. Estivo aí todo o tempo, a analizar a economía e a sociedade con esa ollada libre. Agora reaparece, libre xa dese momento seu no que quixo ser o profeta Xeremías e fracasou.

- EGOÍSMO CONTRA COBIZA. A cobiza dos especuladores financieiros, protexida pola dereita, provocou esta doenza na que a economía quere autodestruírse. Só nos pode salvar o egoísmo de quen quere defender o que ten, o traballo, a dignidade, a vida, o planeta. Só o noso egoísmo nos pode salvar dos cobizosos. A cobiza é homicida e suicida, o egoísmo é apostar por existir. Se o egoísmo é solidario pódenos salvar.

- PRIMEIRO ERA O AUGARDENTE, logo veu o coñá, logo o whisky, agora anda a xente no ron...Todo por non beber no viño.

- "REALISMO SUCIO" foi a etiqueta que lle apuxeron a un momento da narrativa norteamericana. Tiñan eses críticos que ver un programa de sobremesa nas televisións!