Ikerketak eta lankidetzak

Euskaltzaindia da gaur egun euskarazko lexiko orokorrari dagozkion erabakiak hartzen dituen erakunde akademiko ofiziala. UZEI aldez aurreko lanak egiteaz arduratzen da, eta zentroak landutako ikerketak Akademiako txosten eta proposamenen oinarritzat erabili ohi dira normalean.

UZEIn 20 urte daramatzate zeregin honetan. Ondorioz, Euskal Terminologia eta Lexikografia Zentroaren irizpideak gogoan hartzeko moduko aholku bilakatu dira denboraren poderioz.

Askotan, hitzen historiala eta bilakera semantikoa zehaztea da zentroko ikerleek bideratzen duten lanaren helburua, Euskaltzaindiak erabaki bat ala beste har dezan. Ezkutuko landa-lan horrez gain, zentroak bilketa lana ere burutu ohi du. Honen emaitza da, esate baterako, Euskaltzaindiarentzat landu zuen XX. mendeko corpusa.

Horrekin batera, UZEIk lokalizazioak ere egiten ditu, hots, programa informatiko ezberdinen itzulpen espezifikoak. Honela, Word eta Windows bezalako programa eta sistema operatiboak itzuli ditu, itzulpen memoriak kudeatzeko aplikazio bat ere garatu duelarik.

Inguruko beste mintzaira batzuen aldean, euskara gizarte-normalizazioa falta duen hizkuntza da, baina egoera hau ez da hedatzen terminologiaren esparrura.

"Ingelesek ez dute kezkarik beren hizkuntzaren egoeraz, baina frantsesek badakite zertxobait atzeratuta daudela, eta gaztelaniaren kasuan, TermEsp izeneko proiektua garatzen ari dira terminologiari buruzko kezkak bultzatuta", azaldu du Urbietak.

Terminologia eta lexikografiaren esparruan, beraz, euskara frantsesa eta espainieraren kezka maila berean dago. Etorkizuneko erronkei aurre egiteko, UZEIk lankidetza-proiektuak garatu ditu Europako hainbat erakunderekin batera, Pointer, TDCNet eta Melin proiektuak, kasu.