Eusko Ikaskuntzak euskal komunitate globalarentzako webgunea zabaldu du

Eusko Ikaskuntzak Euskosare izeneko topagune birtual berria abiarazi du Interneten, www.euskosare.org helbidean, munduko edozein lekutan bizi diren euskaldunek eta euskaldunenganako interesa duten internatua guztiek elkarren berri jasotzeko aukera izan dezaten.

Euskosare lau hizkuntzatan -euskara, espainiera, frantsesa eta ingelesa- landutako webgunea da. Bertan, Euskal Herriko eta diasporako albisteez gain, euskal komunitate globaleko kideei informazio trukaketa erraztuko dieten zortzi foro tematiko ere aurki ditzakegu.

Duela aste batzuk, Ikertzaileak izeneko foroa abiarazi zen, Oscar Álvarez unibertsitate irakaslearen ardurapean. Foro honen helburua, mundu osoko euskaldunen historia ikertzen diharduten espezialistei eztabaidarako gune irekia eskaintzea da.

Joan den asteazkenean, sarearen jendaurreko aurkezpenarekin bat eginik, beste zazpi foro zabaldu ziren Komunitateak atalean, gastronomia, dantza, musika, irratia, liburuzaletasuna edota euskararen irakaskuntzaz interesatuta dauden guzti-guztientzat. Sustraien bila izeneko atalak, aldiz, emigrazio prozesuen ondorioz harremana galdua duten senide eta ahaideen arteko komunikazioa berreskuratzeko aukera eskaintzen du.

Diziplinarteko proiektu honek diasporako euskal erakunde guztien datu base eguneratuak, eta turismoa, hezkuntza edota ekonomiari buruzko informazio premiak asetzeko moduko edukiak eskaintzen ditu. Bere kudeaketarako, laguntzaile talde zabala eratu da Euskal Herrian eta Ameriketako 20 herrialdetan.