"Kanpotik ez da inor etorriko euskaraz teknologiak garatzera"

Ingeniaritza linguistikoa gero eta garrantzi handiagoa hartzen ari da teknologia berrien alorrean. Sektore horretan dihardu Eleka enpresa euskaldunak.

Galdera. Zer da Eleka?

Erantzuna. Elhuyar Fundazioak eta Informatika Fakultateko Ixa Taldeak sorturiko enpresa da. Ingeniaritza liguistikoaren inguruan zerbitzuak ematea da gure helburua.

G. Jakintzaren kudeaketarekin harremanik al duzue?

E. Hizkuntzaren tratamendua egiten dugu informatikaren bidez. Gaur egun, informazioa hizkuntzan oinarritzen da gehienbat eta hizkuntzan oinarritzen den informazioa abiapuntu izanik, jakintzara iristen zara.

G. Zein motatako produktuak eskaintzen dituzue?

E. Neurrira garatutako produktuak saltzen ditugu.Batetik, testu zuzenketaren ildotik lan egiten dugu, enpresei eta egunkariei eleanitza den zuzenketa zentralizatu bat eskaintzen diegu. Bestalde, informazioaren tratamenduaren aldetik, zaintza teknologikorako zerbitzua eskaintzen dugu, hau da, tresna bat garatu dugu eta honek Internetetik informazioa erosten du enpresei eskaintzeko. Horrela, norbera prentsan non agertzen den eta konpetentzia ere non agertzen den jakin dezakete automatikoki.

G. Nolakoa da euskara eta teknologiaren arteko harremana?

E. Euskararen egoera berezi samarra da, atzeratua edo aurreratua egon daiteke segun eta norekin alderatzen duzun. Azken urteetan asko aurreratu da. Euskararen egoera, hala ere, nahiko konplexua da, hizkuntzaren morfologia konplexua delako eta ez duelako beste mintzairekin zer ikusirik. Horregatik, atzeratuak gelditu nahi ez badugu, bertakook egin beharko dugu dena, ez baita inor etorriko euskaraz teknologiak garatzera.