Puntako garapenak
Massachusetts-eko Institutu Teknologikoan punta-puntako proiektuak garatu izan dituzte betidanik. Horrexegatik, asko dira bertan ikasle, irakasle edota ikerlari modura aritutakoek lortutako sariak; tartean, 46 Nobel sari.Medikuntzaren alorrean, adibidez, bat baino gehiago dira eginiko aurkikuntzak. Nagusienetakoak honako hauexek dira: A bitamina eta penizilinaren sintesi kimikoa; Hiesaren aurkako estrategi berrien sormena, AZT drogaren erabilpenarekin; bihotzekoa, minbizia, leuzemia, birusa edota kimioterapiak sortutako infekzioen aurka egiten duten medikamenduen garapena; eta, azkenik, Hiesa, anemia, diabetea, hepatitisa, hazkundearen hormonaren urritasuna edota Kaposiren sarkomari aurre egiteko tratamendu berriak. Guzti hori gutxi balitz, minbiziaren oinarri genetikoan guztiz iraultzaileak izan diren aurkikuntzak ere egin izan dituzte MIT-eko kideek, tumoreen lehenengo gene kentzaileen identifikazioarekin batera.
Teknologiaren alorrean ere garrantzitsuak oso izan dira Massachusetts-eko zentro honi lotutako aurkikuntzak. Ordenadore digitalaren garapena eragin zuen memoria magnetikoa, lehenengo ordenadore kuantikoak eta elektron baten transistorea dira horietako batzuk. Gainera, galaxia arteko distantziak neurtzeko prezisio handiko teknika optika berria ere MIT-i zor diogu.
Azkenik, apurka-apurka substantzia kimikoak gorde eta sor ditzakeen mikrotxipa eta ADN eta kode genetikoari lotutako aurrerapenek Massachusetts-en dituzte euren sustraiak.
