Galicia 'ye-yé'
Precarias e sen apenas rexistros fonográficos, as bandas pop inzaron a Galicia dos 60.
A época non era politicamente propicia e a opresión abranxía todos os ámbitos sociais. A información musical escaseaba e facerse con instrumentos non resultaba doado. Pero o entusiasmo xuvenil posibilitou os agromos ye-yé na Galicia dos anos 60. Apenas unha presada de singles gardan a memoria daqueles anos, malia a que cidades como Vigo ou Ourense chegaron a contar por decenas as bandas dedicadas a imitar aos Beatles, os Rolling ou os Brincos. No caso de Los Posters, logo Nueva Democracia, as desavinzas propias da postadolescencia fanaron unha traxectoria que se prometía de alto nivel: o seu Sentimental girl triunfou nas listaxes de éxitos de Arxentina e de México. Algunhas destas cancións sobreviven en compilatorios especializados como Spanish Andergraun.
