Tres novos títulos de 'No país dos contos'
A colección No país dos contos, unha iniciativa conxunta da edición galega de EL PAÍS e a editorial Galaxia, continúa hoxe cun novo título. O relato Conto para non comer, con texto de Oli e ilustracións de Andrés Meixide, estará ao dispor dos lectores deste xornal nos quioscos ao prezo de 1 euro.
Os vindeiros luns e mércores a colección ofrece outros dous títulos. No primeiro día da semana, poderase mercar con EL PAÍS o relato Tres princesas namoradas, con texto e ilustracións de Ánxeles Ferrer. O mércores, o libro que se venderá conxunta e inseparablemente co xornal será Camiño solitario, un relato de Ánxela Gracián levado a imaxes por Federico Fernández.
A colección No país dos contos está integrada por 22 títulos, entre eles de autores sobranceiros da literatura galega, destinada aos cativos que se inician na lectura.