Euskal historia izango da aurtengo azokaren ardatz nagusia

Aurreikuspenak betetzen badira, aurtengoa izango da Durangoko Euskal Liburu eta Disko Azoka kokagune horretan egiten den edizioa. Izan ere, bere historian zehar garaiei erantzun emanaz lekualdaketarik egin bada ere, eraikin berriaren lanak hasita daude eta hurrengo urterako bukatuta egon beharko bailukete. Eta aurtengoa, dena den, begi zorrotzez aztertuz gero, ez dago iazko leku bere-berean, ehun bat metrora baizik.

Baina kokalekuarena ez da izango aurtengo feriaren aldaketa bakarra. Hori baino garrantzitsuago irizten diote antolatzaileek informazio gunean egingo den berrikuntzari. Aurreko urteetan bezala, bisitarien kontsultak erantzuteko stand bat egongo da azokan eta bertan bi pertsona arituko dira lanean. Baina horrekin batera, libreki erabilgarri izango diren lau ordenagailu ere bertan jarriko dira, norberak bere kontsultak egin ahal izateko.

Eta berrikuntzen atalarekin jarraituta, azpimarratzeko modukoa den beste bat, haur eta gazteen literatur aretoa 37. edizio honetan ez dela egongo. Horren ordez, azokaren sarrera parean kokatuta egongo da Eusko Jaurlaritzaren Xaguxarrak autobusa, hilaren 6, 7 eta 8an. Irakurzaletasuna bultzatzeko urtean zehar herriz herri ibiltzen den autobusa da hau, eta hiru egun horietan, besteak beste, tailerrak egingo dira, bertako begiraleekin.

600dik gora nobedade

Durangoko Azokaren aurrekontua 374.130 eurotakoa da, hein handi batean standen alokairutik bilduko direnak, eta baita erakundeengandik jasoko diren laguntzekin, eta aurrezki kutxa eta enpresek emandakoekin.

Euskal historia izango da 37. edizio honetako lau egunetan zehar mantenduko den ardatz nagusia, eta horren inguruan arituko dira mahai inguru eta hitzaldiak, gaiaren hainbat punturi helduta. Euskal historia bera, aurkezten dituen erronka eta ikerketa izango dira, besteak beste, bertan tratatuko direnak.

Azokara hurbiltzen direnek aurkituko duten eskaintzari dagokionean, aniztasuna da aipatzeko moduko ezaugarrietako bat: haur eta gazte literatura, nobela, saiakera, sukaldaritza, egutegiak, ipuinak, historia, poesia, artea, gastronomia, politika, bertsoak, jokoak, hiztegiak... eta mota askotako musika, noski.

Nobedadeen zerrenda osatzeko, Gerediaga Elkarteak argitaletxeek -edo argitaratzaileek- irailetik azoka egunak arte kaleratutakoak jaso dituzte. Guztira, zerrenda horri jarraiki, seirehundik gora dira argitaratzaileek Durangora eramango dituztela esandako nobedadeak, formatu eta produktu ezberdin guztiak kontutan hartuta. Hauei, hala ere, gehitu beharko litzaizkieke azken asteotan aurkeztutako lan berriak, kopurua nabarmen igo dezaketenak.

Azokako kaleetan 271 stand kokatuko dira, puntu horietan 15 aldizkari, 44 argitaletxe komertzial, 15 diskoetxe, 9 erakunde, 38 kultur talde, 9 banatzaile, 2 aurrezki kutxa, 2 egunkari eta 3 unibertsitate kokatuko direlarik.

Azokan, salmenta puntuetaz gain, txoko ezberdinak prestatuko dira jarduera guztiei leku egiteko. Ohikoa izaten da komunikabide ezberdinek bertatik erretransmisioak egitea, eta hantxe egingo dira ere mahai inguru eta hitzaldiak. Teknologia berrien txokoa deritzonean 11 erakusmahai jarriko dira, erakunde, eskola, web orrialde eta enpresek lekua izango dutelarik.

Baina feriaren giroa herriko beste puntuetan ere nabarmenduko da, eta honen adierazgarri artisautza feria edo Durangoko San Agustin Kultur Guneko ekitaldiak.