Erro komunak indartuz

Eusko-Txekiar Elkartea 2000 urteko uztailaren 30an eratu zen Txekiar Errepublika eta Euskal Herriaren arteko harremanak sustatzeko. Ordutik ekintza eta aktibitate ezberdinak burutzen dituzte, iraganean erro komunak bilatu eta geroaldiko kontaktu estuagoa bilatu nahian. Nerea Madariaga elkarteko idazkaria da Euskal Herrian. Bilbotarrak bi urte eman zituen Pragako Unibertsitatean, Bizkaiko Foru Aldundiko Diru laguntza bati esker, lehenengo bertako hizkuntza ikasten eta gero, euskara irakasten. Pragako Unibertsitate Publikoan Tomás Buchtele ezagutu zuen Nereak, egun elkarteko idazkaria Txekiar Errepublikan. Bien artean elkartea abian jarri zuten, Txekiar Errepublikan euskal kultura eta hizkuntza zabaltzeko eta gurean Txekiar Errepublika ezagutarazteko.

Pragako Unibertsitateko irakasle eta ikasleek bultzatuta ekin zioten elkarteari. Nereak dioenez Pragan eman zuen denboraldian, 'euskal kultura, tradizio eta hizkuntzaren inguruko mintegi eta hitzaldi ugari antolatu genituen. Euskal Herriaren inguruko informazioa sustatzeko antolatu genituen ekintza guzti hauek. Txekiar komunikabideetan Euskal Herriaren irudi positiboa zabaldu nahi dugu, ez baitugu gure herria beti terrorismoarekin lotua egotea desio. Euskal Herria gehienbat bere hizkuntza paregabea eta bere folklore adierazpen aberatsengatik ezaguna izan dadin nahi dugu, adibidez, euskal pilota edo sukaldaritzagatik', dio Nereak. Elkarteak txekiar komunikabideetan Euskal Herriaren irudi positiboa bultzatu nahi du eta bere ibilbide laburrean informazio iturri bilakatu da. Nereak azaldu digunez 'kazetari ugarik Tomási deitzen diote azken berriak eskatuz. Telebistara ere joaten da saio ugaritan parte hartzera'.

Bestalde, Txekiar Errepublikan dauden liburu, artikulu eta Euskal Herriari buruz dagoen guztia biltzea da elkartearen beste erronka. Txekiar Errepublikan material ugari dago baina Nerearen aburuz, ordea, 'ez dugu honetarako dirurik. Agian aurrerago egin genezake, baina orain ez dugu inongo diru laguntzarik jasotzen, eta ezin dugu horrelako proiekturik burutu'. Euskal Herrian Txekiar Errepublikaren irudi positibo bat sortzea da beste erronka bat. Idazkari euskaldunak dioenez ordea 'ez da lan erraza hemen ez baita kultura eta hizkuntza txekiarrarekiko interesik. Txekiera eta kultura hura ez zaio jende askori interesatzen, beraz, nahi ez duenari erakustea ez da lan erraza izaten'.

Eusko-Txekiar Elkartearen erronka nagusiena orain euskara-txekiera txekiera-euskara hiztegia amaitzea da. Nerea eta Tomás elkarlanean burutzen ari diren proiektu honen lehen atala amaitu du Nereak. Joan den urtean burutu zuen euskara-txekiera atala eta bigarren zatia urtebetean amaitzea espero dute. Hizkuntza hauek ikasi nahi dituztenentzat oso erabilgarria izango da, bi kultura eta hizkuntza hauen arteko lotura uste duguna baino handiagoa baita', dio.