Oparotasunez jantzitako doinuak

Errotuegia dago musika Euskal Herriko kulturan. Aspaldiko meza kantuetatik, tradiziozko artzain abestietan geldialdia eginez, Itoitzen Lau Teilatu edo Negu Gorriak taldearen Gora Herria abestietara heldu arte. Denek neurri berean izan dute eragina. Hauek guztiak eta beste hainbat doinu, irudi eta istorio biltzen ditu Kantuketan erakusketak. Baionako Euskal Kultur Erakundea da honen bultzatzailea, eta bertako zuzendaria den Pantxoa Etxegoinek azaldutakoaren arabera, erakusketa konbentzional batek bildu ditzakeen ohizko elementuetaz gain Kantuketan ekimenak harago heldu nahi izan du, teknologia berriak, heziketa eta bisitari ororen partehartzea, iharduera garrantzitsu eta ezinbesteko bezala sustatuz. 'Gure asmoa ez zen erakusketa intelektual bat antolatzea, aktiboa nahi izan dugu egin. Erakusketa modernoa da Kantuketan, ikusleen jakinmina pizten duena. Honetaz gain, formazioari eta teknologia berriei ere beharrezko garrantzia eman diegu'.

Baionako Bonnat erakustokia izan da otsailaren hasieratik Kantuketan ekimenaren egoitza. Martxoaren 10ean Euskal Herriko beste hiri batzuetarako txangoa hasi behar zuen. Hala ere, hasiera bateko asmoak sute baten ondorioz etenda geratu dira, tamalez erakusketak narriadurak pairatu baititu. Ibiltaria jarraituko du izaten, udan Baionako Bonnat errepikatuko du eta udazkenean Euskal Herriko barnealdeko hainbat herri bisitatuko ditu. Bordelen, Frantziako Tolosan eta Parisen ere izango da eta 2002. urteko maiatzetik ekainera Bilboko Euskal Museoan. Donostiako Koldo Mitxelena erakundearekin ere harremanetan omen daudela aitortu digu Etxegoinek. 'Euskal Herriko eta Frantziako erakustokietara joango gara, 2003. urtean Quebecera eramango dugu Kantuketan eta ondoren Ameriketako hiri eta herri ezberdinak bisitatuko ditugu'.

Hedapena da Kantuketan-ek lortu nahi duen xede garrantzitsu bat eta ildo honetan kultura ezberdinen arteko trukaketa aipatzen du Pantxoa Etxegoinek aberastasun iturri garrantzitsu bezala. 'Kultura bat beste kulturek jazten dutela argi eta garbi izan dugu hasieratik eta horregatik trukaketa bultzatzen ahalegindu gara, euskal musika kanpoan ezagutaraziz eta atzerriko musika Euskal Herrira ekarriz'. Euskal musika talde ezberdinek izan dute atzerriko hainbat herrialde bisitatzeko aukera eta Euskal Herrian Georgia, Maroko edo Txetxeniako kantariak izan dira beste batzuen artean. Iniziatiba honekin jarraitzeko asmoa dute eta etorkizunera begira honen inguruan ekimen ezberdinak antolatuko dituzte Euskal Kultur Erakundekoek.

Euskal kanten funtzio eta aro ezberdinak hiru ataletan antzeman daitezke erakusketa honetan. Lehenean ikus-entzunezko dokumentuak, abestiak eta azalpenak entzun eta irakurri daitezke. Historia ere gozatu ahal izango da, ahoz aho hedatu diren kantak eta istorio bitxiak osagarri izanik. Euskal doinu eta kantak momentu eta toki zehatz ezberdinetan erakusten ditu bigarrenak: bazkari giroak, artzainen bilerak, errito berezi eta kontzertuak. Bertsolaritzak dokumentu informatiko batean du aipu berezia. Azken atalak gaurkotasunari utzi dio tokia, euskal rocka eta beste musika motak ere ikusgai eta entzungai daude.