Unha conexión virtual monte a través

Cando Jesús Conde quere coñecer o nivel de ácidos graxos do leite que producen as súas vacas inicia sesión no ordenador e conéctase a Internet. Aínda que se atope no punto máis remoto da parroquia de Lamas, este gandeiro da Estrada pode acceder aos rexistros da Xunta sobre a calidade do leite e coñecer de forma práctica as análises da súa explotación. “Isto hoxe é indispensable para calquera negocio”, explica Jesús.

A chegada de Internet “fíxolle ben á empresa”. O control que ten a través da rede do leite que producen as súas 100 cabezas de gando outorga valor engadido a unha explotación que presume de vender un producto rico en Omega-3. Estar conectado ao mundo virtual tamén o ten sacado de máis dun apuro. “Hai tres anos rompimos unha peza de maquinaria moi peculiar, unha mangueta, que non había á venda en España. Grazas a Internet atopei unha de segunda man, en Francia e pola metade do prezo á que se vendía no mercado”, explica.

Pero Jesús non se conforma con producir. Quere abranguer toda a cadea de valor do proceso e comercializa o seu leite a través dunha dispensadora informatizada na Praza de Abastos da Estrada, que tamén controla a través da Internet.

A este gandeiro estradense a vida cambioulle desde que en outubro de 2006 o Concello botou a andar a plataforma aestradadixital.com, unha iniciativa situada no marco do Programa Ciudades Digitales. No municipio máis extenso do país hai nestes momentos sementadas 250 antenas que repiten o sinal de acceso á rede, procedente do Edificio de Usos Múltiples do Concello, que alberga a “estrutura neurálxica” da plataforma.Desde aquela, cada vez máis veciños desfrutan de conexión de alta velocidade malia non ter cables. “Multiplicamos a rede por dez desde que comezamos e agora chegamos á práctica totalidade do municipio”, explica Carlos Andújar, o enxeñeiro de telecomunicacións que xestiona a plataforma. Para el o único xeito de extender a conexión por un concello tan grande e cun relevo tan complexo é mediante sistemas sen fíos.

A Internet non só cambiou o mundo do vacún. Tamén o do espectáculo. José Manuel Rodríguez Puente, ou 'Isi', como se lle coñece na TVG, ten máis fácil acceder ao seu traballo. “Antes non había nada, e o pouco que había tiña uns prezos moi altos. Dende hai cinco anos chéganme os guións da tele por correo”.

Ao longo destes ano<TB>s a administración local tamén impulsou a creación de rural-centros, espazos espallados polas parroquias onde os veciños teñan acceso a ordenadores con conexión, e empregou a plataforma para dar pulo ás empresas e comercios do municipio mediante a creación de sitios web.

A Internet é un claro exemplo de que as cousas “van moi rápido”. Ou iso opina Jesús Conde. El polo momento resígnase a aceptar o ritmo frenético dunha economía globalizada que no sector do leite coñecen ben. “O problema é que do rápido que van, ao mellor chega o día no que eu quedo polo camiño”sentenza. Polo momento, con conexión, será máis fácil resistir