"Tiña algo de insurxente"

Balbino fala en primeira persoa dos abusos de Manolito, o fillo do señorito; da soidade obrigada polo loito ao tío Braulio e do amor pola mestra Eladia, que empregaba o galego fóra da escola e cuxa indiferencia lle fai enfermar. A Manuel Rivas (A Coruña, 1957), que descubreu Memorias dun neno labrego no instituto, a voz de Balbino récordalle ao puñetazo no cranio que Kafka lle pedía aos libros. "Que o neno falase do mundo, de querer emigrar ou do medo tiña algo de insurxente. Desprexuíza o contar a vivencia. Por el falaba a infancia de Galicia", razoa o autor.

Eran os tempos nos que o estudante Rivas comezaba a ler en galego: Longa noite de pedra e Sempre en Galiza foron os títulos que acompañaron ao do autor de Vila de Cruces. Rivas -que tamén escolle a voz dun cativo para A lingua das bolboretas- non dubida da actualidade da obra, nin tampouco do seu valor de documento histórico, unha característica que Rivas amplía a toda a obra de Neira Vilas. "Galegos no Golfo de México é un dos mellores libros de novo xornalismo feito en Galicia".