A sala Nasa de Santiago abre canal televisivo na Rede

Da Nasa á Internet. A Nave de Servizos Artísticos (Nasa), fundada en Santiago en 1992 polo grupo Chévere, vén de abrir un canal de televisión na Rede. Os internautas poderán contemplar avances dos espectáculos e actividades programadas na sala, dedicada ás artes escénicas contemporáneas e ás correntes musicais de vangarda. Ademais de entrevistas e ensaios, en redenasa.tv, os xestores da sala compostelá xa penduraron algunhas pezas históricas das moitas horas de gravación de montaxes, entre outras os seus cabarés temáticos -as Ultranoites-, e intervencións de Mofa e Befa, Luís Tosar, Carlos Santiago ou Quico Cadaval.

"A Nasa é un espazo cultural para minorías fidelizadas e este canal é un xeito máis de rachar os receptores e os artistas coa espontaneidade da Rede", explica o actor Xesús Ron, un dos xestores da Nasa, a sala que en 2009 recibiu 16.000 espectadores. A web está configurada para que cada visitante se rexistre e cre o seu propio menú de contidos: "Gustaríanos que esta plataforma fose lugar de intercambio de referencias culturais da nosa audiencia".