Os festivais minguan

Tres concertos masivos riscan o verán: Lou Reed e Laurie Anderson (Santiago, 12 de xullo), Bruce Springsteen (Santiago, 2 de agosto) e Leonard Cohen (Vigo, 13 de agosto). No que respecta aos festivais, o panorama -máis por contidos que por patrocinios- é outro. O único festival indie galego, o Artenativa de Valga, non se celebrará este ano. E as programacións retrásanse: non se sabe aínda o cartel do Festival dos Abrazos nin do Festigal, os dous en Compostela. O Noroeste Pop-Rock da Coruña, que hai dez anos trouxo a The Cure á praia de Riazor, aínda debe precisar datas e contidos. O máis sólido neste sentido, co Xacobeo como primeiro patrocinador, segue a ser o Festival de Ortigueira.

"Un desgoberno de cinco meses fai que proxectos e axudas cheguen tarde"

"Un desgoberno de cinco meses provoca que proxectos, axudas e comunicación cheguen tarde", di Joaquín Martínez, responsable da Asociación Galega de Empresas Musicais. Xulio Gómez, do colectivo Sinsal Audio, súmalle a crise: "Está todo parado. A música socializada é a que máis o paga".

Por orde cronolóxica, o rock de raíz ourensá convoca hoxe e mañá no Fax de Ourense, cos Suaves e Mitocondrias, amais da festa da Shantel & Bucovina Club Orkestar. Tamén en Ourense, o Día da Música de Heineken (antes baixo a marca Galicia Escoita) fará parellas pop con Eladio Santos, Sevigny, Tachenko e Lori Meyers. No que atinxe ao jazz, o primeiro gran ofrecemento é o Imaxina Sons (Vigo, entre o 25 de xuño e o 5 de xullo), que se estenderá por toda a cidade cunha oferta rechamante: este ano co saxo Charles Lloyd como prato forte, o ex Weather Report Miroslav Vitous ou Napoleon Murphy Brock, frontman de Zappa en Bongo Fury. Cos portugueses Low Budget Research Kitchen, precisamente, haberá revival do xenio de Baltimore.

Para escoitar música coas vantaxes do rural, a cita segue sendo na carballeira do Cultura Quente (Caldas de Reis, 10 e 11 de xullo): están confirmados Vive la Fête e a ración de vellas glorias de todos os veráns, en lembranza de cando Arthur Lee estivo a piques de tocar en Silleda. Este ano recuncan en Galicia Sylvain Sylvain e David Johansen, mantedores da marca New York Dolls. Antes, no FM Music Festival (Malpica, 3-5 de xullo) xúntanse 6pm, Dr. Think, Niños Velcro e Los Coronas. Coincidindo co Cultura Quente, pero na Coruña, terá lugar unha das escasas apostas temáticas do verán: o VI Lex Luthor Weekend Internacional Sixties Summer Meeting. O enorme ámbito do posible entre os 50 e os 70, se falamos de música negra, con Los Granadians del Espacio Exterior, referente europeo do rocksteady e o reggae branco. Inclúe feira de discos e picadiscos de todo o mundo no Playa Club. A cita folk segue sendo o Festival Internacional do Mundo Celta (Ortigueira, 9-12 de xullo). Aínda hai arestas no cartel, pero a "volta á ortodoxia", segundo avanzan, maniféstase nunha implicación máis activa da Escola de Gaitas. As actuacións confirmadas son as de Susana Seivane, Budiño, a banda canadense La Bottine Souriante, os escoceses Battlefield Band, os leoneses Sog ou Wolfstone.

Festivais coma o Nordestazo Rock (Malpica, 18 de xullo) ou o Resurrection Fest (Viveiro, 31 de xullo e 1 de agosto), con Toy Dolls e Napalm Death, cadran no tempo co máis parecido a un Benicàssim galego: o festival de Paredes de Coura (Portugal, do 29 de xullo ao 1 de agosto). Nesta edición, á baixa, achéganse Franz Ferdinand, Supergrass, The Rascals ou Nine Inch Nails. Tamén unha icona pop, Jarvis Cocker, en loita contra o pasado.

Ata a fin do verán repiten datas, entre o 7 o 9 de agosto, o Alternavigo (vén Hamlet), o Castelo Rock de Muros, (Siniestro Total e Boikot) ou o Brincadeira de Ordes (Dios k te Crew e Los Reyes del K.O.). O XI Felipop, nos mesmos días, trae a Fene un cartel con Roger de Flor, os Azeitonas, Mamá ou Doctor Explosion. O Lolapop, último venres de agosto en Pontecaldelas, é outro dos festivais que resiste.