1996 Ana Mendieta

O CGAC repasou a traxectoria da artista nacida en Cuba e que pasou a súa vida entre a illa caribeña e Estados Unidos. Nos anos setenta, Mendieta facía obras performáticas nas que cuestionaba as convencións sociais dos xéneros e a violencia social e política contra a muller. A importancia da súa obra foi medrando nos anos seguintes á súa morte, ocorrida en 1985. A exposición dedicada á súa obra foi comisariada por Gloria Moure e é lembrada coma unha das máis importantes sobre a artista cubana. Nese mesmo ano houbo mostras dedicadas a Medardo Rosso e Antón Lamazares.