Omenaldi historikoa

Euskaltzaindiak omenaldi beroa eskaini zion atzo Jean Haritschelhar euskaltzain emerituari Akademiaren barruko zereginetan egindako bizitza osoko lanaren eskerronez, eta opari gisa, Andres Urrutia euskaltzainburuak erakundearen erabateko onarpen ofiziala suposatzen duen lankidetza-hitzamena sinatu zuen Frantziako Euskararen Erakunde Publikoarekin euskaltzainburu-ohiaren aurrean.

Iragana eta etorkizuna eskutik helduta heldu ziren atzo Euskaltzaindiaren egoitzara. Akademiaren ekitaldi aretoan, euskararen modernizazioaren lekuko eta eragile izan ziren Piarres Charriton, Jose Luis Lizundia, Jose Antonio Arana Martixa eta eskola zaharreko gainerako euskaltzainen ondoan, Euskaltzaindira kaleko euskaldunen ahotsa eraman nahi duten belaunaldi berriko euskaltzainak ikus zitezkeen, Aurelia Arkotxa, Joan Mari Torrealdai eta Sagrario Aleman tarteko zirela.

Bertan izan ziren, halaber, Paulino Luesma, Espainiako Gobernuaren EAEko ordezkaria; Gérard Guillonneau, Frantziako kontsul nagusia Bilbon; Marc Cabane, Pirinio Atlantikoetako prefeta; Miren Azkarate, Kultura sailburu eta euskaltzaina; Xabier Azanza, Euskararen Nafar Institutuko zuzendaria, eta Max Brisson, Euskararen Erakunde Publikoko lehendakaria.

Eta gonbidatu guztien artean, Jean Haritschelhar hizkuntzalari, irakasle eta euskaltzale baigorritarra, 1989tik 2004ra bitartean Akademia gidatzeko ardura bere gain hartu zuena. "Villasante eta zu Euskaltzaindiaren gobernuari molde berria ekarri dion bikotea zarete, aldian aldiko eskakizunei ateak irekiz eta gizartearen iritzia aintzat hartuz", esan zuen Andres Urrutia euskaltzainburuak.

Hunkituta, Haritschelharrek Euskaltzaindiak eta Euskararen Erakunde Publikoak atzoko ekitaldian sinaturiko lankidetza-hitzarmenaren garrantzi historikoa azpimarratu zuen, "horrek erakusten baitu hizkuntzari buruz sekula baino gehiago sortzen eta sendotzen direla lokarriak Iparraldearen eta Hegoaldearen instituzioen artean", esan zuen.

Akordio horren arabera, Euskaltzaindia izango da aurrerantzean hizkuntzaren kalitatea zaintzeaz arduratuko den erakunde ofiziala Euskararen Erakunde Publikoak sustatutiko ekimen guztietan, "kalitatea baita hizkuntza bat menperatzeko eta gizakiak elkarrekin komunikatzeko gainditu beharreko erronka", esan zuen Brissonek.