"Un festival é unha boa inversión"

Xaime Casas leva moitos anos traballando na organización de concertos e na promoción de grupos musicais galegos e de fóra da comunidade autónoma á fronte da productora Idea Rock, que ten a súa sede en Vigo. A pesar da crise da industria discográfica e das dificultades financeiras que sofren moitas das institucións que organizan os festivais, Casas non cre que os tempos sexan especialmente malos para este negocio. Na súa opinión, os grupos que realmente son bos sairán adiantes e os que non quedarán fóra do circuíto. Tampouco pensa, coma din algúns, que os concertos sexan a salvación dos grupos.

Pregunta. É certo que coa crise das discográficas os concertos convertéronse na principal fonte de ingresos dos grupos?

Resposta. Non hai unha regra xeral que permita dicir iso, depende moito do grupo do que esteamos falando. A verdade é que cando un grupo ten éxito ten que ir tocar onde lle pidan, sempre que se cumpran as condicións que marca o seu representante. A venda de discos nunca foi a principal fonte de ingresos dos grupos, iso é un mito, porque os royalties comezan a ter certa importancia cando se superan as 10.000 ou 20.000 copias dun disco.

P. A crise financeira dos concellos está repercutindo moito nos cachés dos artistas e na propia organización dos concertos?

R. O que se está notando é que os concellos teñen menos orzamento. De todos os xeitos, nós agora dependemos máis do que nos pagan polos cachés dos artistas que do que percibimos pola venda de entradas dos concertos, xa que nos dedicamos preferentemente ao management. Tampouco é certo o que se dicía de que antes os concellos pagaban máis do que marcaba o mercado aos artistas. Nós comezamos a traballar a finais dos noventa e dende entón os cachés dos artistas están bastante axustados. Hai que ter en conta que para montar un bolo con 30.000 ou 40.000 euros teñen que traballar unhas 20 persoas e non é tan fácil coma din algúns cubrir os gastos.

P. Esta semana anunciouse un festival en Santiago con orzamento dun millón de euros. Cómo é posible en tempos de crise coma os que vivimos?

R. Son cifras grandes pero hai que ter en conta que cando un festival está ben organizado pode ter un retorno publicitario que chegue a triplicar a inversión feita. Temos agora un exemplo aquí co festival Vigo Transforma, que está a ter unha gran repercusión mediática e seguramente vai producir moitos réditos para a cidade. Ás veces poder ser un mellor investimento para o turismo apoiar eventos deste tipo que sacar na televisión unhas imaxes moi bonitas das rías baixas que xa viu todo o mundo.

P. É verdade que hoxe en día sae más caro contratar un grupo español con escasa traxectoria que un grupo internacional contrastado?

R. Iso pode ocorrer e de feito ocorre, pero hai que ter en conta tamén que o campo de acción dos artistas nacionais está máis limitado porque o teñen mais complicada para ir tocar fóra. É certo que hai artistas internacionais de calidade que podes traer a Galicia a un prezo moi bo, pero hai que traballar moi ben a produción. Co que hai que ter coidado é coa calidade dos grupos. A única forma de saír adiante e conseguir o respaldo do público e iso só se consegue traballando arreo.

P. Hai moitos festivais en verán, pero poucos noutras épocas do ano. Non habería que desestacionalizar?

R. Nós xa o vimos facendo e de feito temos un festival, Microfest, que organizamos no mes de novembro. Creo que programar os concertos e festivais noutras épocas do ano vai ser cada vez mais necesario. Agora temos en Galicia moitos contedores que temos que encher. Tamén penso que cada vez son mais inviables os grandes eventos de balde. E imposible manter a calidade dos grupos con este tipo de eventos.