Morre o escritor coruñés Manuel Riveiro Loureiro

O escritor Manuel Riveiro Loureiro morreu onte na súa cidade natal, A Coruña, logo de se precipitar dende unha fiestra do seu domicilio. Narrador e dramaturgo, Manuel Riveiro contaba 75 anos e autodefiníase como "escritor vocacional, talvez compulsivo, anque serodio". Coa súa derradeira obra, Xullo-Agosto, o autor coruñés gañara o premio Lueiro Rey de novela curta en 2005 e nela relata episodios dos primeiros meses do levantamento franquista. "Áos tres anos de idade, no verán do 36", escribía nun texto autobiográfico, "perde o seu pai; 'non morreu que o mataron', dicía en voz baixa a súa nai".

Manuel Riveiro comezou a publicar libros ao seu regreso da emigración. Na segunda metade da década dos 70, este "admirador teimudo e confeso da noutrora formidable URSS" deu ao prelo títulos como Pola ida e pola volta (narrativa, 1977) ou A vinga (teatro, 1979). A literatura dirixida a lectores mozos centrou os esforzos de Riveiro Loureiro durante boa parte da súa traxectoria.