Aita Ondarra zenaren ordezkoa abenduko bileran hautatuko dute

Jean Haritschelhar, Jose Luis Lizundia eta Xabier Kintana euskaltzainek proposatu zuten Ana Toledo Juan San Martin zenaren lekua betetzeko. Kandidatura irailaren 23an aurkeztu zen Altsasun, Akademiak bertako Udaletxean egin zuen osoko bilkuran.

Euskaltzaindiaren arauek euskaltzain berrien hautaketa-prozesuetarako ezartzen duten hilabeteko epea amaitu ondoren, bozketa Mungiako Udaletxean egin zen joan den ostiralean, euskaltzainek Lauaxetaren jaiotzaren mendeurreneko ospakizunaren aurretik egin zuten osoko bilkuran.

Hau ez da izango, ordea, Euskaltzaindiaren baitan aurten egingo den hautaketa-prozesu bakarra, Aita Patxi Ondarra euskaltzain nafarraren heriotzak hutsik utzi baitzuen uztailaren 30ean aurretik Aita Polikarko Iraizotzek bete zuen euskaltzain aulkia.

Andres Urrutia euskaltzainburuak Altsasuko bilkuran jakinarazi zien ofizialki Akademiako kideei Aita Ondarraren heriotzaren albistea, hutsik geratu den aulkirako hautagaiak aurkezteko epea zabalduz.

Euskaltzaindiaren arauen arabera, ondorengo bi hilabeteetan -kasu honetan, urrian eta azaroan-, euskaltzainek nahi beste hautagai aurkez ditzakete hutsunea betetzeko.

Behin epe hori amaituta, hurrengo osoko bilkuran bozketa egin behar da. Hautagai bakarra aurkeztuz gero, bozketan ezezkoa nagusituko balitz, prozesua oso-osorik errepikatu beharko litzateke.

Honek esan nahi du, Euskaltzaindiak abenduaren 16an Bilboko egoitzan egingo duen osoko bilkuran, Nafarroari dagokion euskaltzain berriaren izena ezagutaraziko dela, baldin eta bozketan ezezkoa nagusituko ez balitz, noski.

Jardunaldiak

Bien bitartean, euskaltzainei ez zaie zer eginik faltako ondorengo asteotan. Hasteko, azaroa

ren 24 eta 25ean, VIII. Herri Literatura Jardunaldiak egingo dituzte Donostian.

Jardunaldi hauek aldiro-aldiro antolatzen ditu Euskaltzaindiko Herri Literatura azpibatzordeak, eta aurten, herri-prosa izango du aztergai.

Herri literaturari buruzko lehen jardunaldiak Villabonan egin ziren 1989an. Orduko hartan, kontapoesia aztertu zen. Ondorengo edizioetan, herri-narratiba, ahozkotasuna, paremiologia (esaera zaharrak eta atsotitzak), herri-antzerkia, fraseologia eta kantu laburrak aztertu ziren.

Abenduaren 16an, azkenik, Euskaltzaindiak IX. Jagon Jardunaldiak antolatuko ditu Akademiaren egoitzan. Edizio honetan, Bilboko Elizbarrutiak euskarari eman dion trataera aztertuko da. Aurreko Jagon Jardunaldietan, Iparraldeko, Nafarroako eta Arabako elizbarrutietako egoera arakatu zen.