'Haurrak musikara gerturatzea oso esperientzia polita da'

Fagotaren, oboearen, flautaren eta klarinetearen doinuen artean, Loinaz Jauregi bikoiztailearen ahotsak Bremengo musikariak kontzertua kontatzen die antzokian adi diren ikus-entzule txikiei. Musika Hamabostaldiaren egitarauaren barnean, Grimm anaien izen bereko ipuin klasikoan oinarritutako kontzertua eskaini zuen joan den abuztuaren 28an Daxa boskoteak Donostiako Kursaalean. Musika instrumentu bakoitza animalia bat izanik, Loinaz Jauregi narratzaileak istorioa askatzen laguntzen die musikariei. Bikoiztaile lanak egin dituen beasaindarrak ahots ezberdinez janzten ditu asto, oilar, katu eta zakurra, bakoitzak bere nortasuna baitu. Bildutako haurrak begi zabalik gelditzen dira eserlekuetatik mugitu gabe.

'Prestaketa lana konplexua den arren, emaitza entzuteko zoragarria da'

2000. urteko ekainean estreinatu zen lehenengo aldiz Bremengo musikariak obra Gasteizko Printzipalean eta harrera oso ona izan zuen. Franz Tischhauser konpositore suitzarrak idatzi eta egokitu zuen Grimm anaien ipuinean oinarritutako lana. Bertsio musikatu borobil honetan Loinazek dioenez 'nik ipuina kontatzen dut, musikan barne nire hitzak egokituz. Izan ere, kontatzen ari naizena musikariek deskribatu egiten dute'. Narrazioa izanik, kontzertu bat ere bada, narratzaile batek, Loinaz Jauregik, gidatutako kontzertua hain zuzen.

Ikuskizuna hasi aurretik, oihalaren aurrean Loinazek aurkezpen bat egiten du eta musikariak atzean egoten dira, ezkutuan. Narratzaileak ipuin bat entzuteko aukera dutela esaten die umeei baina ipuin berezia dela, musika izango baita ipuinaren kontalaria. Loinazek dioenez, 'haurrek musika uler dezaten adibide batzuk jartzen ditugu eta instrumentu bakoitza dagokion aberearekin identifikatzen erakusten diegu kontzertua hasi baino lehen. Bestalde, animaliak oinez ari direnean ere adibidez, musikaren soinua zein den erakusten diegu. Horrela, obra askoz ere errazago ulertzen dute'.

Hauxe ez da Loinazek egiten duen lehen kontzertu narratua, izan ere, Euskadiko Orkestra Sinfonikoarekin nahiz Bilboko Orkestrarekin ere izan baititu beste esperientzia batzuk. 1998. urtean Babar elefantea izenburuko kontzertu didaktikoan hartu zuen parte eta hurrengo urtean, Euskadiko Orkestra Sinfonikoarekin, Kattalin Txiki obra aurkeztu zuen. Bilboko Orkestrarekin El sastrecillo valiente lanean ere parte hartu zuen eta orain Bremengo musikariekin ari da buru belarri. Loinazek dioenez 'oso esperientzia polita da musika ezagutzeko aukera duzulako'. Hala ere, obra hau oso zaila izan dela aitortzen du Loinazek; musikariek, bakoitzak bere etxean entseatu dute baina gero lan guztia ongi jostea eta elkartzea ez omen da erraza izan. Ahots sarrerak ez dira errazak, momentu oso konkretuetan egin behar baititu narratzaileak eta instrumentuen arteko armonia ere lortu beharra dago. Loinazek dioenez 'obra prestatzeko oso konplexua da, eta entzuteko eta disfrutatzeko zoragarria'.

Berez guztiz estatikoa den ikuskizunean haurrak geldi eta adi egotea lortzen dute kontzertu narratu hauetan, haien eserlekuetan eseri eta mugitu gabe egoten dira. Horixe baita helburua, 'haur eta gazteei musika gerturatzea eta disfrutatzeko gaitasuna izaten irakastea'.