Milurtekoa kantuz agurtu

Noiz amaituko da milurtekoa? Zientzia-gizon-andereak eta telebistako sasijakintsuak etengabe ari dira egunotan ahoz-aho dabilen galderari erantzun koherentea eman nahirik. Edonola ere, beste batzuek eztabaida filosofikoari muzin egin diote eta, badaezpada ere, ospatzen hasiak dira jada, 2000. urtean berriz bukatuko ote den jakin nahi ez dutela. Milurtekoari agur esateko hainbat jai eta ekitaldi antolatu dute munduko bazterretan. Katalunian doinuz, kantuz eta dantzaz jantzitako jaialdi erraldoia prestatu dute. Josep Carreras tenorea buru duen Concert Studio promotorearen zuzendaritzapean estilo eta genero desberdinak uztartuko dituzte Milurteko Jaialdia izenpean abenduaren 27tik urtarrilaren 9ra egingo diren 14 emanaldietan, tartean bi euskal kantari izango direla: Ainhoa Arteta eta Mikel Laboa. Antolatzaileen asmoa egitarau "zabala" osatzea eta emanaldi arruntetara hurbiltzen ez diren entzuleak erakartzea izan da, horretarako esparru desberdinak jorratzen dituzten artistak bilduz. Soprano tolosarra, adibidez, bere estiloarekin zerikusirik ez duen artista izango du lagun: Ángel Corella dantzaria. Abenduaren 27an izango da Bartzelonako Palau de la Músican.

Raimonekin batera

Mikel Laboa, berriz, aspaldiko adiskide batekin batera ariko da agertoki berean: Raimon abeslari katalanarekin. Palau de la Músican bertan ezagutu zuten elkar duela 35 urte inguru, 60ko hamarkadan hain zuzen. Donostian jaiotako gazte luze hura aipatu lekura joan zen Raimon izeneko kantari baten emanaldia entzuteko asmoz. Aldaketa garaia zen Katalunian. Zenbait kantari eta kulturgintzako kidek sortu berria zuten Setze Judges izeneko mugimendua, katalanez ez zekitenentzat ahoskaezina zen aho-korapilo baten izenarekin hitz-jokoa eginez. Al vent entzun zuen orduan Laboak eta kantaldia amaitu ondoren Raimonengana hurbildu zen.

Urte haietan sortu zuen gazte luzeak Ez dok hamairu mugimendua, Katalunian ikusitakoa eredu hartuta, eta han hasi zen oraindik eten ez den urtetako harremana. "Raimonek berak deitu zidan Milurteko Jaialdian kantatzeko", dio, "mestizaien ideia azaldu zidan eta ondo iruditu zitzaidan". Geroago itzuliko zen berriz ere Palaura Ez dok hamairu-ko beste bi kiderekin, Benito Lertxundi eta Lourdes Iriondorekin, baina kantaldia eskaintzera orduan. Beraz ezaguna du "joan den mende bukaera eta mende honen hasierarako antzoki ederra", berak esaten duenez.

Hala, aspaldiko lagunekin egoteko aitzakia ezinhobea izango du Milurteko Jaialdian, berak ez baitio "garrantzia gehiegirik" ematen egutegiaren digito aldaketa dela eta sortu den zalapartari. "Esaten dute informatika eta horrelako kontuetan izango direla arazoak", dio apal-apal, "baina guretzat ez da ezer aldatuko. Bizitza aurrera eramatea eta denon artean hobeto konpontzea da kontua. Baina ez dut uste hori urtebetean edo bi urtetan konponduko denik".

Hala ere, agertokira irtetean "pixka bat urduri" jarriko da, beti bezala, batetik "garrantzitsua" delako "urduri jartzea", baina baita Kataluniako entzuleei errespetu handia dielako. "Jende kultua da. Musika entzutera ohituta daude eta kritikoak ere badira. Euskaldunak baino formalistagoak dira, baina oso interesgarriak", azaldu du.

Jaialdiko kontzertu guztiak lau agertokitan egingo dituzte: Liceu, Kataluniako Arte Museo Nazionala, L"Auditori eta aipatu Palau de la Músican. Binaka eta hirunaka ariko dira ia artista guztiak, antolatzaileak haien arteko nahasketarik interesgarriena lortzen saiatu direlarik. Horren erakusle da emanaldiei amaiera emango dien kontzertua, bertan Josep Carreras eta Madredeus taldeko Teresa Salgueiro abeslari portugaldarrak abestuko baitute, Ariel Ramirezekin batera.

Aurretik beste konbinazio interesgarri batzuk izango dira. Vicente Amigo gitarra jole eta konpositorea izango du lagun Sant Cugateko Orkestra Sinfonikoak; Carlos Nuñez gaita jolea eta Elftheria Arvanitaki kantari greziarra ere batera ariko dira; eta beste horrenbeste egingo dute María Dolores Pradera eta Rosanak. Guztira, 20tik gora artistak esango diote agur milurteko zaharrari.