Influencias de tres continentes no jazz de Imaxina Sons

A VI edición do Festival de Jazz Imaxina Sons de Vigo desenvolverase na cidade do 23 de xuño ao 4 de xullo vindeiros. O director artístico do certame, o contrabaixista ferrolán Baldo Martínez, o edil de Cultura vigués, Xesús López, e directora de programación da Obra Social de Caixanova, María Pereira, presentaron onte no Concello os contidos dun certame que se identifica coas correntes de vangarda do jazz europeo, sen esquecer o berce estadounidense deste xeito de abordar a música, e que ten vocación de plataforma para os proxectos musicais máis próximos.

Dita condición asegura, en cada edición, unha nutrida representación do jazz feito en Galicia, como serán as presencias de Monkillos (trío formado polo contrabaixista Xacobe Martínez Antelo, o baterista Miguel Cabana e o guitarrista Marcelino Galán), o guitarrista Marcos Pin e o noneto Factor-E-Reset e mais unha orquestra de jazz dirixida por Roberto Somoza; ademais haberá un ciclo nocturno en locais de ocio, cun programa que se desvelará en datas próximas ao festival, para artistas emerxentes. Hai lugar, asemade, para as bandas conformadas como cruce de sonoridades, eis o sexteto Atlantic Bridge, liderado polo pianista galego Alberto Conde e o mestre neoiorquino Steve Brown, ou a proposta Tri-EZ, na que participa o propio director do certame cabo doutros músicos de renome: o pianista mallorquín Agustí Fernández e o batería alacantino Ramón López.

Entre os outros nomes estelares, figura este ano o do trompetista de Nova Jersey Dave Douglas, quen dará o concerto de clausura co pianista Uri Caine no seu quinteto, ademais de formar grupo, Mompiana, co pianista Lluís Vidal e o saxofonista Perico Sambeat en xornadas precedentes. Ao abeiro desta nova andaina, o público terá ocasión de se reencontrar con tres personalidades excepcionais unidas por unha paixón compartida. A fascinación por África, que conduce a súa música, e as fotografías de Guy le Querrec, que forman parte da posta en escea, son o motivo que impulsa o trío Root Africaine, formado polo batería Aldo Romano, o clarinetista e saxofonista Louis Sclavis e o contrabaixista Henri Texier. A intertextualidade tamén protagoniza a requintada proposición do trompetista Franz Koglmann, Lo-lee-ta, baseada no clásico de Nabokov.

Aos lugares acostumados (Teatro Caixanova, Conservatorio Superior e Marco), súmanse, desta volta, o remodelado Auditorio Municipal, que reabre as súas portas para a ocasión, e a Praza da Constitución. Outra das novidades será a posibilidade de adquirir abonos, a partir do 5 de maio, para todos os concertos de pago (tres en Caixanova, tres no Marco e tres no Concello) por menos de 50 euros.