Berrogüetto cambia de voz
O cantautor Xabier Díaz releva a Guadi Galego na banda de folk
"Necesitaba descansar, e aquí non podes abandonar durante dous anos. Algo tiña que deixar". Guadi Galego, voz en Berrogüetto, Nordestinas e Espido, decidiu aparcar o proxecto máis grande, imaxe de marca do novo folk galego desde 1996, para cavilar "que facer". Xabier Díaz, que xa colaborara con Berrogüetto en Hepta (2001), aportará voz, gaita e percusión no disco que prepara a banda para 2009.
Non houbo problemas na familia folk. Galego, irmá de Santiago Cribeiro (acordeón, piano e teclados en Berrogüetto), mantén Espido, a dúo co guitarrista Guillermo Fernández, tamén de Berrogüetto, parte esencial nos discos en solitario de Díaz, e pensa dedicarlle máis tempo á súa outra banda, Nordestinas, con Ugia Pedreira e Abe Rábade. "Con Nordestinas só tivemos 15 concertos", apunta Galego. A vocalista, mestra de música na Berenguela e no Conservatorio de Música Tradicional e Folque de Lalín, pensouno "durante moito tempo". O futuro agora conta trazalo con calma. "Para ter cousas que dicir cómpre vivir e sentar. Polo de agora non penso niso da carreira en solitario, pero eu fago música todos os días".
"Agora temos por diante o traballo de adaptar o repertorio de Guadi á voz de Xabier", sinala Guillermo Fernández. A voz de Guadi prestáballe imaxe e intensidade ao grupo desde Viaxe por Urticaria (1999), o segundo disco da banda. O tema Xente, na voz de Guadi, serviulle asemade ao BNG como sintonía de campaña nas eleccións municipais de 2007.
"Nós non buscabamos un substituto de Guadi", aclara o guitarrista, que louva a capacidade de Díaz para fusionar a música de raíz coas harmonías da música contemporánea. "Xabier interpretará eses temas ao seu xeito. Ten un grande talento interpretativo e compositivo e un gran coñecemento do mundo tradicional, algo moi importante para Berrogüetto".
O grupo traballa arestora o directo, en previsión de fixar as súas tradicionais desaparicións na procura de material para o seguinte disco. O ano de transición de Berrogüetto rematará a finais do verán, e entón darán comezo as súas coñecidas asembleas. "Para que todo o mundo aporte, trátase de levar ao ensaio ideas suficientemente inacabadas", resume Fernández.
O cambio de rexistro na seguinte versión de Berrogüetto, que en 2006 presentara 10.0, a xogo co décimo aniversario de Navicularia, o seu premiado disco debú, valórao tamén o multiinstrumentista Anxo Pintos. "Non foi un proceso cruento", ironiza. "Iniciamos o novo capítulo con ilusión, apetecíamos probar certo cambio no timbre de voz". Pintos, armador tamén da orquestra folk Son de Seu ou Lizgairo, con Rodrigo Romaní e Xosé Liz, recoñece o cambio de prazos que impón a mudanza de personaxes.
Díaz, a voz masculina máis visible do folk galego, terá que cadrar a nova encomenda co seu traballo de vocalista na Compañía Nova Galega de Danza. Para o autor de Músicas de salitre (2005) e Coplas para Icía (2007), esta é "unha viaxe nova cunha banda de moito talento, agora teremos que atoparnos".
![Guadi Galego, nunha actuación no Festival Celta de Ortigueira.](https://imagenes.elpais.com/resizer/v2/NWWFRWCZ32W2IB5IVKFRPRFRMM.jpg?auth=3666ee89726b58c41d9ae6b735e3d1fd874150d4bfd10f892846f656f5729ca7&width=414)
Tu suscripción se está usando en otro dispositivo
¿Quieres añadir otro usuario a tu suscripción?
Si continúas leyendo en este dispositivo, no se podrá leer en el otro.
FlechaTu suscripción se está usando en otro dispositivo y solo puedes acceder a EL PAÍS desde un dispositivo a la vez.
Si quieres compartir tu cuenta, cambia tu suscripción a la modalidad Premium, así podrás añadir otro usuario. Cada uno accederá con su propia cuenta de email, lo que os permitirá personalizar vuestra experiencia en EL PAÍS.
En el caso de no saber quién está usando tu cuenta, te recomendamos cambiar tu contraseña aquí.
Si decides continuar compartiendo tu cuenta, este mensaje se mostrará en tu dispositivo y en el de la otra persona que está usando tu cuenta de forma indefinida, afectando a tu experiencia de lectura. Puedes consultar aquí los términos y condiciones de la suscripción digital.