Selecciona Edición
Conéctate
Selecciona Edición
Tamaño letra
Reportaje:Gaiak

Sakeleko mitologia

Telefono mugikorrentzako euskara hutsezko lehen jokoa plazaratu berri dute

Euskarak beste muga bat gainditu du teknologia berrien alorrean. Hemendik aurrera, sakeleko telefonoaz euskaraz jolastu nahi dutenek pertsonaia mitologikoak bilatzeari ekin ahal izango diote Bilboko Animatu Multimedia enpresak garatu duen Mamutxen eremua izeneko joko berriari esker.

Hauxe da telefono mugikorrentzat euskaraz ekoitzitako lehen jokoa. Dozena erdi bat lagunek jardun dute iazko abuztuaz geroztik proiektu hau aurrera atera nahian. "Orain arte, Interneterako jolasak, animazioak eta bestelako aplikazioak landu izan ditugu, baina produktu horien errentagarritasun txikia ikusirik, merkatu hau arakatzea erabaki genuen", azaldu du Pernan Goñi Animatuko partaideak.

"Sarean zailtasun handiak dituzu orohar dirua irabazteko, Interneten bitartez zabaltzen diren edukirik gehienak doakoak baitira, baina ez da gauza bera gertatzen sakeleko telefonoekin. Badirudi mugikorretan jendea ordaintzeko prest dagoela logoak, doinuak edo jokoak lortzearren", gaineratu du.

Teknologia berrien arlo honetan plazaratutako lehen produktua Kukuxumuxurekin batera garatutako erdarazko jokoa izan zen. "Iazko irailean jarri genuen salgai eta 10.000 deskarga lortu ditu", esan du enpresako arduradunak.

Merkatu berria

Euskarazko merkatua jorratu gabe zegoela ikusirik, tankera horretako produkturen bat garatzeko aukera aztertzen hasi ziren. Bazen, ordea, gogoan hartu beharreko beste datu jakingarri bat: sakeleko telefono horietatik guztietatik, zenbat dira Java lengoaia informatikoaz hornituta daudenak? "Han-hemenka kontsultatu ditugun ikerketen arabera, Mamutxen eremua jokoak lor dezakeen erabiltzaile potentzialen kopurua euskaldunen %25era mugatzen da, horixe baita geure artean teknologikoki egokituta dauden mugikorren portzentaia", zehaztu du Goñik.

Matematikoki, beraz, ezinezkoa zirudien mugikorrentzako euskarazko jokoa lehiatzeko moduko prezioetan merkaturatzea. "Zorionez, Eusko Jaurlaritzako Kultura Sailak euskara teknologia berriekin uztartzeko banatzen dituen dirulaguntzei esker, ametsa egia bihurtu ahal izan dugu", ziurtatu du Animatuko kideak.

Horrela, Mamutxen eremua esploratu nahi dutenek aski dute "eremu" hitza 7505 telefono zenbakira bidaltzea, eta hiru euroko prezioaren truk, Basajaun, Tartalo, Sugaar eta euskal mitologia tradizionaleko beste pertsonaia batzuen gordelekuak bilatu ahal izango dituzte. Gazteei zuzendutako abentura jokoa da, inongo indarkeria arrastorik ez duena. Joko honen gaineko informazioa Interneteko helbide honetan eskura daiteke: www.animatu.com/eremu.

Animatu Bilbon sortu zen duela hiru urte, teknologia berriei loturiko aplikazioak eta marketing eta aisialdirako baliabideak garatzeko asmoz. Telebistarako produktuak ekoitzi ditu, eta telefonoetarako jokoaz gain, Oihutegia izeneko chat grafiko bat garatu du, baita erabiltzaile askorentzako jokoa ere, Papera ta idazkortza izena duena, www.jolastu.com webgunean.

* Este artículo apareció en la edición impresa del Lunes, 31 de enero de 2005