Un anfiteatro para o burato do Gaiás

Máis alá dos erros que sen dúbida cometeron algúns arquitectos para contribuír ao espallamento do feísmo polo país, a imaxe do colectivo viuse tamén moi afectada polo que aconteceu coa Cidade da Cultura. O proxecto de Peter Einsenman é o exemplo do desastre ao que conduce a combinación dunha mala decisión política cos delirios de grandeza dun arquitecto estrela.

"Tamén houbo algo de mala sorte", sinala Carlos Quintáns, "porque o certo é que Einsenman nunca conseguiu finalizar unha obra de xeito correcto e no caso do Gaiás o proxecto fóiselle das mans". O arquitecto coruñés di que o ruído mediático que rodea a Cidade da Cultura está a ocultar outras realidades máis pequenas, pero que teñen consecuencias moi importantes. "Por desgraza, hai veciños que cun investimento de 3.000 euros destrúen cousas na paisaxe", engade.

José Valladares aplaude a decisión de paralizar as obras no complexo do Gaiás, malia que considera que non se pode deixar o burato que ía ocupar o non nato Teatro da Música nas actuais condicións. O certo é que se non se atopa algunha solución, a impresión que levarán os visitantes é que se trata dun recinto en permanente estado de construción. "Quizais unha boa solución sería habilitar un espazo de concertos ao aire libre, un anfiteatro. En xeral creo que a decisión debería ir na liña de apostar pola reintegración paisaxística. Deste xeito, o que agora pode parecer malo se cadra acaba sendo bo", sinala o arquitecto do estudio RVR.

Valladares contrapón o proxecto arquitectónico desenvolvido por Peter Einsenman no Gaiás ao realizado polo aro holandés Rem Koolhaas na Casa da Música de Porto. "A Cidade da Cultura inaugurouse hai moi pouco tempo e xa quedou vella, mentres que o edificio de Koolhaas leva anos funcionando perfectamente e ten un público consolidado", apunta Valladares.

A pregunta é se paga a pena seguir realizando investimentos, aínda que non sexan tan grandes como os feitos ata o de agora, para conseguir o obxectivo de que o Gaiás teña unha aparencia máis humana. A actual situación de obra inacabada tampouco beneficia a mellorable imaxe pública do complexo.