'Vai de Camiño' levará máis de cen concertos a vilas do país
A vila de Narón vivirá, o vindeiro domingo, un desembarco de cantautores. Carlos Bau, Paris Joel, Pablo Rubén Fernández, César de Centi, Xurxo Mares, José Luis Paz, David Taboada e Fátima Baña despregarán, a partir das oito e media do serán no Auditorio, a súa conxunción clasicista de texto e música. O cónclave desenvólvese dentro do programa Vai de Camiño, da Sociedade Anónima de Xestión do Plan Xacobeo, dependente da Consellaría de Innovación e Industria. Por Narón, en Ferrolterra, pasa o denominado Camiño Inglés de Santiago.
A cuarta edición de Vai de Camiño comezou o 23 de xaneiro no Círculo das Artes de Lugo. O espectáculo de danza de Thomas Noone Dance, Crush-Chaos, encetou unha programación que, este ano, ofrece a novidade de estruturarse en dous bloques, un específico para o inverno e outro de verán. Até o mes de abril, haberá "propostas artísticas adaptadas aos espazos cubertos dispoñíbeis nos concellos polos que transcorren as diversas rutas xacobeas". Amais dos cantautores -en nove encontros diferentes-, circularán grupos de danza, canción de autor ou "concertos de pequeno formato".
Canda novos intérpretes como Andrés Suárez, Samuel Levi ou Roberto Sobrado, o Vai de Camiño convoca a veteranos da escena en Galicia: Xoán Rubia, Miro Casabella, María Manuela, Xoán Eiriz, Xurxo Mares ou Joaquín Lera. Kimuru e Kike Ganso subirán ao escenario de Miño o 20 de febreiro; en Vedra serán, ao día seguinte, Joe Barnara e Najla Shami e o 24 de febreiro, en Mos, Andrés Suárez e Yomelo Montoslo continuarán o calendario programado. O 6 de marzo volverá haber xuntanza de cantores en Culleredo.