Irakurlerik txikienen gida

Urtero euskaraz argitaratzen diren liburu guztiak irakurtzen dituzte taldeka, gomendagarriak diren lanak azpimarratuz. Ez dira idazleak, ezta kritikariak ere, irakasleak eta liburutegi-zaintzaileak baizik, eta onartzen dituzte euren mugak eta gabeziak, baina, urteetako esperientziarekin, osatzen duten Haur eta Gazte Literatur Gida ezinbesteko erreferentzia bihurtu da.

Mondragon Unibertsitsateko Haur Liburuen Mintegiaz ari gara. Humanitate eta Hezkuntza Zientzien Fakultatean sortu zen duela 15 urte. Bi astetan behin biltzen dira, irakurritako liburuen berri elkarri emateko.

Jatorriz euskaraz idatzitakoak nahiz itzulpenak eskuratzen dituzte. Ekainerako irakurrita dauzkate aurreko urtean euskaraz kaleratutako liburu guztiak, eta irailean zerrenda ateratzen dute argitara, paperean nahiz internetez. Beraz, despisterik ez bada, gida horretan aurki daitezke aurreko urtean dendetan salgai egon diren liburu guztiak.

Zerrenda horretan hiru multzo daude: liburu gomendagarriak, oso gomendagarriak, eta gainerakoak. Taldekoek komentario txikia esansten diote oso gomendagarri saileko argitalpen bakoitzari.

Hortik aurrera, bakoitzak emango dio lan honi merezi duen fidagarritasuna eta balioa. Dudarik ez da, baina, eragina baduela, Euskal Herri osoko ikastetxeetan banatzen bait da.

Nerea Alzola hasieratik dabil mintegian lanean. Gogoan dauzka orain 15 urte inguru Arrasateko bailaran irakurketa arloan hutsune galanta zegoela eta lanari ekitea pentsatu zuten egun haiek; batetik, haur eta gazte liburuak irakurtzen hasi ziren, literatur mundu hori gertutik ezagutzeko; bestetik, hainbat ekitaldi antolatu zituzten. Urte batzuk geroago, dirulaguntzak eskasak izanik ere, Haur Liburen Gida urtero kalera ateratzen da.

Alzolak beldurrik gabe onartzen du benetan latza zaiela irizpideak zehaztea liburu bat haur edota gazteentzat aproposa den esateko. Hizkuntzari erreparatzen diote, noski, aberastasunari, metaforen erabilelari; baita pertsonaien aurkezpenari, edota gaiaren tratamenduari ere; fantasia bada, ea sinesgarri gertatzen den ala ez; baita ere marrazkiei, batez ere umeentzako diren argitalpenetan, albumetan, adibidez.

Liburu bakoitzak mintegiko bi kidek irakurtzen dute eta ados badaude berehala erabakitzen da nola sailkatu: oso gomendagarria, gomendagarria ala gainerakoetan. Baina bi kide horiek ados ez badatoz, hirugarren edo laugarren bati ematen zaio argitalpena, irakurri eta iritzia eman dezan. "Ez da zerrenda ofiziala, gu ez gara kritikariak, baina urte mordoa daramagu honetan eta horrek ematen digu nolabaiteko agintea", argudiatzen du Nerea Alzolak.

Gero eta liburu gehiago

Urtetik urtera euskarazko liburuen kopurua gehitu egin denaren inpresioa dauka. Hala eta guztiz ere badira husak. Itzulpen batzuk ingelesetik euskarara zuzenean egiten dira, baina badira lehenik erdarara ere egiten direnak, eta horrek sortzen ditu hainbat aldrebeskeria. "Aurkitu izan ditugu akatsak euskal bertsioetan, erdarazkoarekin alderatzerakoan", argitzen du mintegiko arduradunak.