Trifolium fala co presente a través de Mayor Zaragoza e Stevenson
A editorial Trifolium e a súa colección Musa pedestris articulan de modo singular no contexto da edición en lingua galega o seu diálogo co tempo presente. Tras traducir títulos como O mercado e a globalización, de José Luis Sampedro, ou A natureza humana: xustiza versus poder, o debate que Michel Foucault e Noam Chomsky afrontaron en 1971 diante das cámaras da televisión holandesa, o selo que dirixe Xan Arias retoma a palabra con dúas novas versións. Xa están nas librarías Apoloxía dos ociosos, de Robert L. Stevenson, e Delito de silencio, un texto de Federico Mayor Zaragoza cun alcume abondo elocuente: "Chegou o momento. É tempo de acción".
An Apology for Idlers, traducido por María Fe González Fernández como Apoloxía dos ociosos, viu a luz por primeira vez en 1877. Foi un dos precoces traballos ensaísticos do escocés Robert L. Stevenson (1850-1894), a quen lle faltaban aínda cinco anos para publicar a que talvez sexa a súa novela máis popular, A illa do tesouro, que Xerais reedita este mes na tradución que Xavier Alcalá fixera en 1990. O texto, no que o editor ve un "canto á vida" e ao poder "revolucionario" do lecer, dialoga con outra referencia de Trifolium: Eloxio da ociosidade, de Bertrand Russell.
"Chegou o momento"
Begoña Combo Castro asina pola súa banda a importación dende o castelán de Delito de silencio, un texto recente do ex director xeral da Unesco e actual presidente da Fundación Cultura de Paz, o barcelonés Federico Mayor Zaragoza. No ronsel da saga de Stéphane Hessel, en canto toma de conciencia histórica dunha xeración -con 17 anos de diferenza en favor do español, nado en 1934-, o volume quere contribuír, en palabras do editor, a construír "un novo mundo á altura da dignidade humana" nos primeiros pasos deste infausto século XXI.
"Ora sexa secretamente reunidos en Bildeberg, ora a cara descuberta en Davos, os patriarcas financeiros seguen a impór a súa ditadura económica e dítanlles a Parlamentos cada vez máis impotentes como e cando suprimir os Dereitos Humanos e Sociais da cidadanía", explica Xan Arias no limiar do libro. "Chegou, por fin, o momento dos pobos, das mulleres e homes do mundo enteiro que toman nas súas mans as rendas do seu destino", retruca Mayor Zaragoza nas primeiras páxinas do seu libro. "Chegou o momento de non admitirmos o inadmisíbel".
