Selecciona Edición
Conéctate
Selecciona Edición
Tamaño letra
Luces

Yann Tiersen e 'indie' español no festival Vigo Transforma

O músico bretón Yann Tiersen será un dos cabezas de cartel da segunda edición do Festival Vigo Transforma, que regresará ao Porto da cidade este verán con adianto de datas e un día máis de duración con respecto ao ano pasado. No acto de presentación, os representantes das produtoras Esmerarte e Music2Day, respaldados pola presidenta da Autoridade Portuaria, o conselleiro de Cultura, o xerente do Xacobeo e a directora de Radio 3, avanzaron algúns dos artistas que actuarán no certame, que se celebrará os vindeiros 30 de xuño e 1 e 2 de xullo.

Os galegos Catpeople, Eladio y los Seres Queridos, a cantautora Russian Red e os madrileños Vetusta Morla non só cadrarán sobre o escenario, senón que tamén coinciden na circunstancia de estaren todos eles presentando o seu segundo traballo discográfico. Tamén está previsto que Xoel López e os portugueses The Gift acodan para estrearen novos repertorios, amais dos neoiorquinos The Pains of Being Pure at Heart e Hola a Todo el Mundo. "Apostamos por asumir riscos con grupos de calidade e non estirar o chicle das xiras", indicou Ricardo Calabuig, de Music2Day. Alén de vindeiras confirmacións, unha vintena de grupos actuarán, en paralelo e de xeito gratuíto, nun segundo escenario habilitado pola publicación Mondosonoro e Radio 3, emisora que volverá retransmitir o festival en directo, "porque a radio pública ten que estar presente nos primeiros pasos dos festivais importantes", afirmou a súa directora, Lara López.

Segundo apuntou o xerente do Xacobeo, Ignacio Santos, "60.000 persoas participaron nas actividades" do festival. Precisamente, a plantación de árbores nun monte público da parroquia viguesa de Bembrive que comeza hoxe, dá cumprimento a unha das obrigas da primeira edición, en calidade de festival sostible: carballos e castiñeiros para compensar o impacto ambiental xerado polo evento.

Outra volta, regresará o programa multidisciplinar Vasos comunicantes, comisariado polo artista galego Isaac Cordal, coa incorporación da moda e dos documentais as súas actividades. "A pesar de ser o segundo, este festival xa é unha aposta consolidada que afonda na transversalidade da música", referiu o conselleiro de Cultura, Roberto Varela. Entre as novidades figura a nova imaxe: unha recreación do escenario principal, obra do pintor gaditano Cecilio Chaves.

* Este artículo apareció en la edición impresa del Viernes, 25 de marzo de 2011