Do concurso ao focos do espectáculo
Daniel Bellón non se queda con ningún gaiteiro en particular. "Admiro a todos os que se dedican á gaita", asegura sen asomo de non crer no que di, "nun eido tan difícil para se manter e vivir como a música". Mais, acto seguido, deixa escapar a súa querenza de fan: "O que está aí arriba, con méritos máis que sobrados para estar aí arriba é Carlos Núñez". Bellón foi alumno do gaiteiro vigués nun curso de perfeccionamento desenvolvido en 2001. "Esta ao nivel dos artistas máis altos", expón, e continúa: "Aquí sempre houbo moita envexa, pero Carlos Núñez é un referente. Pode gustarche ou non, pero é boísimo e quen diga o contrario, mente".
Fóra, ou antes, do espectáculo folk, están os concursos de gaiteiros dos que Daniel Bellón forneceu o seu palmarés. "Non, non son descendente de Constantino Bellón, investigueino e só compartimos a zona natal", comenta divertido. Co patronímico Constantino Bellón convócase, dende 1991 e polo Ateneo Ferrolán, o certame de gaita máis concorrido do país. Para Daniel B. foi en tres ocasións, pero a listaxe de vencedores ratifícase anos despois ao esculcar na paisaxe da música tradicional: Pepe Vaamonde, Suso Vaamonde, Óscar Miranda,Brais Monxardín e Pablo Devigo foron algúns dos galardoados, as máis das veces tras interpetar pezas de composición propia, obras tradicionais e versións de músicas académicas (J. S. Bach ou Olivier Messiaen).
Na edición de 2009, o Concurso de Gaita Galega Constantino Bellón celebrouse, por vez primeira, sen o apoio económico da Xunta. O Concello de Ferrol e Deputación da Coruña achegaron os cartos necesarios para un concurso que distinguíu a Jesús Rodil por unha melodía titulada Lugrís.
