Os acabados de chegar aos anaqueis

Os últimos volumes publicados polas editoriais galegas arrecenden a tinta fresca nos anaqueis das librarías. Algúns destes libros do trinque conteñen saberes instrumentais para ocupar as horas ociosas, como A cociña de Larpeiros (Galaxia), unha compilación de 150 receitas recollidas polo cociñeiro de Chapela Benigno Campos e postas en práctica no programa homónimo da TVG. Segundo a información distribuída pola casa editorial viguesa, trátase "dun percorrido saboroso pola cociña galega de sempre, tradicional e sinxela, á que engade unha achega persoal en cada un dos pratos propostos e a recomendación dun viño axeitado para os acompañar". Saúde e lecer harmonizan na proposta de Xerais, Itinerarios seguindo o río Miño, do montañeiro Paco Armada, autor desta guía de viaxe a pé (tamén con indicacións para o coche) polas ribeiras do Miño e a súa contorna. Ademais de mapas e itinerarios, o volume indica sobre o patrimonio artístico e monumental, así como apuntamentos arredor dos ecosistemas.

Na importante escolla dos compañeiros de sesta poden contribuír títulos como Pirata, a terceira novela da escritora, tradutora e cooperante María Reimóndez, ambientada no século XVIII e editada por Xerais. Literatura de aventuras subvertida e feita pretexto para falar doutros asuntos, como a busca da identidade, a loita pola liberdade en tempos difíciles e as múltiples posibilidades da vida. Galaxia adiántase aos grandes mercados editoriais coa versión en galego da primeira novela do escritor turco Orhan Pamuk trala concesión do Premio Nobel de Literatura en 2006. O museo da inocencia, até o de agora só dispoñíbel nunha única lingua europea, o alemán, é unha tradución de Bartug Aykan e María Alonso Seisdedos que sae do prelo na colección Biblioteca Compostela, a mesma que conta con outros dous títulos de Pamuk en galego. A Nosa Terra aporta un texto teatral, Con Franco no armario, do recentemente nomeado académico, Bernardino Graña, e os relatos do escritor portugués José Viale Moutinho, Negra sombra! Negra sombra!, verbo da guerra do 36 e dos paseadores en Galicia.

Tampouco quedan desatendidos os que verdadeiramente están de vacacións. O verán é unha grande oportunidade de encontro cos cativos ao redor dun libro. Oqo aproveita a coxuntura para reeditar Cocorico, un conto de orixe birmana que a editorial pontevedresa publicou por vez primeira en 2006, adaptado por Marisa Núñez e coas ilustracións de Helga Bansch. Outra novidade é a edición do álbum A guerra dos números, do cubano Juan Darién, gañador do Premio de Ilustración no CJ First Picture Book Awards 2008. Para o público infantil está destinada a última entrega do escritor Francisco Castro, Chamádeme Simbad, mentres que Faíscas, de María Canosa, e As sete mortes, de Carlos Vila Sexto (os tres títulos en Galaxia) están indicados para os adolescentes. Non todo é prosa. O poemario Makinaria, de Carlos Negro (Xerais), é unha sorprendente aposta pola poesía para lectores xuvenís.

Para a lectura vagarosa e concentrada no arelado tempo libre que chega, as editoriais ofrecen un feixe de textos de carácter investigativo, como Petroglifos de Galicia (A Nosa Terra), un estudo de Antonio de la Peña Santos con fotografías de Xulio Gil encol da arte dos gravados na pedra. En Pedras de Compostela, Xerais edita 68 relatos asinados por Aldonza de Praterías, acompañados polas instantáneas de Manuel G. Vicente, que percorren a historia compostelá ao longo de nove séculos. Na colección Crónica de Xerais, o profesor Xesús Alonso Montero publica estes días Cartas de republicanos galegos condenados a morte (1936-1948), o primeiro corpus epistolar deste xénero, territorio e período que se publica. E, da man de Galaxia, chega A mecánica da maxia. Ficción e ideoloxía en Álvaro Cunqueiro, o estudo de Manuel Forcaleda ao redor do universo creativo do escritor mindoniense en galego.