A banda deseñada busca espazo no Saló del Còmic de Barcelona
Máis de 30 creadores galegos protagonizan ata o 20 de abril mostras, presentacións e mesas redondas no Saló del Còmic de Barcelona, a principal cita do cómic en España. É a primeira vez que Galiza conta con caseta propia. Nela inaugurouse onte unha mostra que xunta ata 70 títulos editados nos últimos anos, e hoxe comeza a asinar David Rubín, autor revelación no Saló do ano pasado.
O director de Creación e Difusión Cultural, Luís Bará, aproveitará para presentar a denominada estratexia global de apoio á banda deseñada. O material promocional complétase co folleto ABC BD, elaborado polo Consello da Cultura Galega, que repasa o panorama do cómic galego nos últimos anos. Jacobo Fernández, Miguel Porto, Hugo Covelo ou Víctor Rivas participarán como autores e como representantes dos colectivos BD Banda, Cerditos de Guinea Cómics, Faktoría K, Fuck Cómics, Polaqia ou Retranca.
O Saló, que destaca sempre os seus premios, organizoulle a Miguelanxo Prado, Rubín e o fanzine Barsowia, do colectivo Polaqia, gañadores o ano pasado, tres das sete mostras previstas para o evento. Para a delegación galega, este recoñecemento "permite proxectar a BD galega máis alá das nosas fronteiras".
No medio dun XXVI Saló espectacular, os autores galegos loitarán polo espazo entre propostas multitudinarias: desde a exposición Viñetas censuradas, con exemplos dos últimos 102 anos, de Cu-Cut! e El Jueves, ata a retrospectiva de Mortadelo e Filemón. Por non falar dos convidados: este ano veñen Moebius, Milo Manara, Quino e Peter Bagge, autor da serie Odio, un dos últimos éxitos internacionais do cómic norteamericano dos 90.
Este ano é Alberto Vázquez quen compite en tres categorías: mellor obra, guión e debuxo por El Evangelio de Judas (Astiberri). Non é a primeira vez. Por Freda, con guión de Kike Benlloch, xa fora nominado a autor revelación en 2002; Psiconautas valeulle dúas nominacións máis en 2007, e agora terá que competir con Miguel Brieva (Enciclopedia Universal Clismon), Roger Ibañez y Raule (Jazz Maynard), Paco Roca (Arrugas) e unha reflexión íntima do coinventor de Makoki, Miguel Gallardo, que en María y y yo estuda os vencellos coa súa filla autista.
"Ganar é o de menos", di Vázquez, que incorporou a El Evangelio de Judas, "as aventuras dun esquío católico", a estética do grabado medieval e o colaxe, máis recargado do que nel é habitual. A nivel narrativo mantén a sucesión de historias curtas. "O fundamental do cómic é que haxa calidade narrativa", remarca Vázquez, "o aspecto gráfico depende dos gustos".
Vázquez, que vive da ilustración, di vivir "un pouco á marxe do que é o autotobombo, que tamén resulta importante".
Cultura insire o progresivo afiunzamento da banda deseñada galega no marco estatal na "estratexia de internacionalización da cultura galega". Ás reunións da Mesa da Banda Deseñada acoden ata o momento a Asociación Galega de Profesionais da Ilustración e vicarios das Xornadas de Banda Deseñada de Ourense, Viñetas desde o Atlántico e do Salón do Cómic de Cangas, ademais das bibliotecas municipais da Coruña.