O difícil acordo asturiano

A promoción do galego ten "cada vez mellor acollida" nas comarcas do Bierzo e da Alta Sanabria, segundo a responsable de Política Lingüística, Marisol López. Logo da renovación do acordo entre a Xunta e a Junta, López fala de "case 1.000 alumnos" casteláns cursando estudos de galego en centros de Primaria e Secundaria.

"O novo estatuto de autonomía da comunidade veciña mantén a consideración do galego como unha lingua que se debe protexer", di. Por vez primeira, un centro de Lubián ofertará o ano que vén o programa formativo de lingua galega.

O tema asturiano é á parte. A finais de 2006, a Academia da Llingua Asturiana comezou a máis intensa campaña a favor do que eles chaman "lingua eonaviega". O obxectivo é conseguir a cooficialidade de bable e lingua eonaviega na reforma do Estatuto asturiano, e que o galego, lingua propia dos concellos máis occidentais de Asturias (Navia, Villaión, Allande e Ibias) pase a chamarse así, considerándose "pexorativa" a denominación galego-asturiano. "A posibilidade de iniciar clases en galego nos centros asturianos está paralizada", lembra López. "Non por falta de vontade pola nosa parte, pero non existe reciprocidade por parte do Goberno asturiano". Non se albiscan solucións políticas para un problema de escaso percorrido filolóxico, se ben a titular de Política Lingüística afirma que o traballo "continúa".

No caso de Extremadura, onde existe unha versión medieval do galego en tres concellos do norte (frisando con Salamanca e Portugal: San Martín de Trebelle, As Ellas e Valverde do Fresno), as trazas son outras. Política Lingüística espera poder abrir vías de colaboración para a promoción da lingua no Val de Xálima. Se falamos de conservar a fala, a disposición do Goberno extremeño inclúe as perspectivas de subvención dos Bens de Interese Cultural. O consenso é "fundamental", remarca López.