Cultura recurta a mostra teatral de Cangas, que comeza hoxe

Con 20.000 euros menos de orzamento por mor da rebaixa da Consellería de Cultura, que este ano achega 10.000 euros no canto dos 30.000 acordados, a 27ª Mostra Internacional de Teatro Cómico e Festivo de Cangas arrinca hoxe cun programa que abrangue funcións nas salas, espectáculos de rúa, obradoiros, presentacións editoriais e encontros profesionais, mais carente dalgunhas montaxes que a organización, a Asociación Cultural Xiria e o concello cangués, tiña previsto inserir.

O que o recurte se levou por diante consiste en seis producións de Brasil, Italia, Cataluña e Madrid (El Coloquio de los Perros de Teatro de la Abadía era unha das máis agardadas), e dúas galegas. O mantemento da aportación municipal (19.000 euros), o incremento da subvención da Deputación (de 1.000 a 6.000 euros), xunto coas contribucións procedentes de empresas e de colectivos sociais e mais a recadación obtida da venda de entradas, son os piares nos que se apoiaron os promotores para defenderen o festival de teatro máis antigo do país.

Deica o sábado 10

Os Cómicos dell'Auto de Teatro de Ningures, na Alameda Vella (18.00 e 21.00 horas), o pregón da actriz Mónica Caamaño (22.00 horas, Auditorio Municipal), seguido, no mesmo lugar da función Chirigóticas da compañía andaluza homónima, e Life is a paripé, dos Galegos Obras Públicas (00.00 horas, Salasón) son as propostas que inauguran nove días nos que se estreará o último do mimo belga Elliot, O gladiador do humor, e a montaxe Hámster dos madrileños Sala Triángulo sobre textos do morracense Santiago Cortegoso, entre outras. Os galegos Tanxarina protagonizarán unha das primicias do certame, Trogloditas, con escenografía de Pablo Pastor e dirixida por Evaristo Calvo (venres 9 e sábado 10, Paseo do Sinal). A mestura de clown e pantomima de Mimirichi Teatro de Kiev, Guerra de Papel, e Folk Oral de Carlos Blanco clausurarán o encontro o día 10.

Como novidades, a sección De Gorra, aberta aos cómicos ambulantes e a exposición Photo Teatro, coproducida co Festival de Teatro Fazer a Festa de Porto na que os espectadores se fotografan como personaxes. A celebración das Xornadas da muller, o encontro de revistas de teatro e unha conferencia de Lino Braxe sobre a relación de Luís Seoane coas artes escénicas completan o programa.