Ourense remata con libro o Ano Blanco Amor

Se o roteiro d'A esmorga se debeu á iniciativa civil do historiador Marcos Valcárcel, así tamén as homenaxes a Eduardo Blanco Amor en Ourense, polo 50º aniversario da publicación d'A esmorga, non deron acabado no ano.

O 3 de abril de 2009, o Pen Club e a Deputación -un dos seus primeiros empregos fuxidíos- celebraron o medio século da novela cun acto conxunto. O Concello tomouno con máis calma, pero o Ano Blanco Amor comezou no último trimestre do ano pasado. En xaneiro, despois de Reis, saíu o libro-homenaxe coordinado pola editorial Difusora de Letras, Artes e Ideas, coa colaboración da Axencia Galega das Industrias Culturais e a Concellería de Cultura ourensá. Cunha tiraxe de 1.500 exemplares, CD e DVD no mesmo paquete, EBA 5.0. O universario de Eduardo Blanco Amor 50 anos despois d'A esmorga, tira de cumpreanos "para xerar novo coñecemento a partir d'A esmorga", en palabras do director da editorial, Xabier Paz. Trátase, asegura, de "revisar a obra con prospección de futuro".

"A pretensión era xerar novo coñecemento a partir da novela"

Nese camiño se insiren, por unha parte, as colaboracións do artista vigués Álex Mene, que analiza ao EBA que retrataba os mozos n'A beleza da amizade ou a vida secreta das imaxes, ou o propio traballo de Xosé María Buxán Bran, tamén "un posíbel relato da vida e das imaxes de Blanco Amor". A parte narrativa consúmese coa engádega de José Somoza Medina, que fai un percorrido pola cidade do pasado e a do presente, incluíndo a transformacións dos tipos sociais.

Deixando á parte o Tres de Troula, xogo de mesa co Bocas, o Cibrán e o Milhomes en formato recurtable, nos outros soportes adxúntase unha das farsas para monicreques de Blanco Amor, a cargo dos lalinenses Viravolta, e un mosaico plural nas 12 cancións compostas para a ocasión. Dos Guezos a Burgas Beat e a Banda Municipal de Ourense.

Capítulo á parte e a adaptación en banda deseñada d'A esmorga. A noite e as sombras, de Carlos Rafael Ramos e Jaime Eizaguirre, sitúa a acción nos 70. "Non tivemos en conta a versión publicada do libro", di Paz.