Os debuxantes anímanse

"Vivimos un momento dourado, en canto a número de debuxantes e a calidade media, iso é indiscutible". Así de rotundo se mostra Miguelanxo Prado, o autor mais importante de toda a historia da banda deseñada galega, sobre o momento que viven as viñetas no país. Prado non só encabeza ese "momento dourado", senón que foi o primeiro dunha ringleira de debuxantes galegos en dar un paso adiante e experimentar co paso á animación, a través do primeiro filme que acaba de dirixir: De Profundis, producido por Continental.

Este auxe da banda deseñada está a provocar que moitos novos autores sigan as rilleiras marcadas por Prado, e tamén estean a dar o salto á animación, como David Rubín, Manel Cráneo ou Xoán Carlos Abraldes. "En Galicia estamos nun momento emerxente, e eses momentos de eclosión son ocasións que hai que aproveitar porque é cando mais cousas interesantes se producen", explica Prado, un autor que xa en 1998 deu un gran salto cara á animación ó traballar para a mítica factoría americana Dreamworks como deseñador de personaxes na serie Men in black.

Un dos debuxantes que trata de aproveitar esa ocasión é o ourensán David Rubín, que está a preparar a súa primeira longa de animación cun dos referentes deste xénero en Galicia: a produtora Dygra. Logo de producir O soño dunha noite de San Xoán , e a exitosa O Bosque animado, Dygra está a producir O espírito do bosque, a súa terceira longametraxe de animación, que Rubín codirixe con Juan Carlos Pena e están a piques de rematar, logo de case tres anos de traballo. "Un resiste mellor economicamente no audiovisual, o que pasa é que agora os tebeos, que son a miña orixe, convertéronse nun sobresoldo", explica Rubín, un debuxante que non para de coleccionar premios nos últimos anos. O seu último traballo, La tetería del oso malayo, esgotou a primeira edición en tres meses, e está nominado a catro premios no Salón do Cómic de Barcelona, que se celebra estes días: mellor guión, mellor obra nacional,mellor debuxo e autor revelación. Rubín traballa para Dygra desde hai oito anos, logo de que o chamaran para facer storyboards. "Despois había que facer unha curta e encargáronme dirixila, e agora toca película", conta.

Os 'storyboards'

Pola vía dos storyboards tamén se asomou ó audiovisual Manel Cráneo, un debuxante devoto das historias mortuorias. Cráneo debutou con éxito na animación coa curta Ladróns de cadáveres vs. Ku-Kus-Klan, que dirixiu con Xurxo García e prepara xa a segunda, titulada Os Mortos. Este debuxante foi reclamado por Antón Reixa para facer o story d' O lápis do carpinteiro, e acaba de repetir con Hotel Tívoli, que se estreará a primeiros de maio. "Aínda que pareza estrano, en Galicia hai mais industria na animación que na banda deseñada en si mesmo, na que non hai industria e todo está fóra", explica Cráneo, que tamén preside a Asociación Galega de Profesionais da Ilustración (Agpi). Para Cráneo, "a asociación dá unha medida do que hai no país, con preto dun cento de asociados, entre os que figuran desde caricaturistas e ilustradores ata un alto porcentaxe que traballa na animación". Según o presidente de Agpi, "xa se está dando o paso dos debuxantes á animación, pero falta a adaptación dos comics á acción real, ó estilo de 300 ou V de Vendetta, e ese paso tamén temos que dalo en Galicia, porque hai moi boas historias".

Dentro destes debuxantes que están a dar o salto ó audiovisual, tamén aprecen outros como Xoán Carlos Abraldes, que acaba de dirixir a súa primeira curtametraxe Man, un proxecto de animación en 3D onde o alemán de Camelle é o fío conductor, ou Mariano Casas, realizadr de cinco microlfilmes titulados Filmiños.