Luís Tosar estreará o 'paseo da fama' do Festival de Cans

O apretado programa do VII Festival de Curtametraxes de Cans (O Porriño) pódese resumir no tempo en que a cociñeira do Bar Fortes, na mesma parroquia do sur de Galicia, prepara unha fotoxénica tortilla de patacas. Esa medida de planificación horaria acáelle a un festival que organiza concertos musicais e proxecións de cinema en galpóns, adegas e toda caste de cubertos destinados a gardar animais e apeiros de labranza, pero que, catro días ao ano, acollen a maior concentración de profesionais da música e da escena audiovisual galega por metro cadrado do país.

Tal xuntanza de celebridades no eido rural produciu un concepto, o agroglamour, que non por casualidade é o lema da vindeira edición, do 19 ao 22 deste mes de maio. O resumo desa realidade está no almodovariano cartaz que promociona o festival, no que loce un stiletto de charol negro cuxo tacón remata nun forcado: metáfora do Cans actual que propicia a convivencia da alfombra vermella das estrelas cos instrumentos habituais para apañar esterco ou recoller a herba.

Cos estalidos dos tubérculos fritíndose no aceite na cociña do Fortes como banda sonora, o director do festival, o guionista Alfonso Pato, iniciou onte a presentación dos contidos desta edición do festival debullando as numerosas frontes, seccións e iniciativas dun certame que o ano pasado chegoui a congregar a máis de 7.000 espectadores nunha aldea habitada realmente por 400 persoas o resto da tempada.

A presenza do actor Luís Tosar será noticia por partida dobre: como líder do grupo de rock Di Elas presentará en primicia as novas cancións da banda nun dos seus escasos concertos e como premiado actor do momento por Celda 211, que xa foi merecente en Cans do premio Pedigree 2004, inaugurará unha das novidades do certame: un paseo da fama, chamado Torreiro das Estrelas, que deixará constancia do paso pola aldea porriñesa dos grandes protagonistas do celuloide. O seguinte en deixar a súa pegada será Ernesto Chao, o coñecido intérprete homenaxeado deste ano co galardón Pedigree.

Outra innovación é a creación dun xurado composto integramente por habitantes dos diferentes barrios de Cans. Encargarase de entregar o recentemente creado Premio dos Veciños. Nesa categoría e en todas as demais, que serán observadas por un tribunal participado polo actor Carlos Blanco e polo escritor Suso de Toro, entre outros, compiten as doce curtametraxes galegas de ficción e as sete de animación seleccionadas para o concurso. Fóra da carreira polos premios oficiais, haberá máis exhibicións gratuítas, como un ciclo de animación procedente de Portugal, e as estreas absolutas dos filmes documentais O mono Paco, de Piño Prego, sobre o célebre simio da Alameda de Redondela, e Naipe de sangue, o primeiro western á galega, dirixido por José Ballesta e o crítico e novelista Miguel Anxo Fernández.