'Inoizkari' kosakoa

Ni gure Amarekin ari nintzen telefonoz. Uste dut Iban patata tortila jaten ari zela, Rikardo, ez dakit baina etxean egonen zen, arropa zintzilikatzen, seguru aski. Angelek Burlatako 7. etorbidea eta 37. kale artean zihoala esan zidan, eta Ibon, uste dut egunkaria leitzen ari zela".

Ez da telebistan hain arrakastatsu bilakatu den bakarrizketa saio horietako baten gidoia, literatur aldizkari berri baten sorrera-agiria baizik, Juanjo Olasagarre idazle eta erredakzio batzordeko kidearen esanetan. Berarekin batera, Iban Zaldua, Ibon Egaña, Rikardo Arregi eta Angel Erro idazleek erditu dute l...

Ni gure Amarekin ari nintzen telefonoz. Uste dut Iban patata tortila jaten ari zela, Rikardo, ez dakit baina etxean egonen zen, arropa zintzilikatzen, seguru aski. Angelek Burlatako 7. etorbidea eta 37. kale artean zihoala esan zidan, eta Ibon, uste dut egunkaria leitzen ari zela".

Ez da telebistan hain arrakastatsu bilakatu den bakarrizketa saio horietako baten gidoia, literatur aldizkari berri baten sorrera-agiria baizik, Juanjo Olasagarre idazle eta erredakzio batzordeko kidearen esanetan. Berarekin batera, Iban Zaldua, Ibon Egaña, Rikardo Arregi eta Angel Erro idazleek erditu dute literaturaren ur barea astintzeko asmoa duen "inoizkari kosakoa". "Kontua da orduan haragitu zela gugan euskal literatura moñoñotasunetik salbatzeko deia. Eta horretara jarri ginen bakoitza bere aldetik harik eta patuak elkartu gaituen arte", erantsi du Olasagarrek.

Aldizkari -barkatu, inoizkari- salbatzaileak pasa den astean ikusi zuen argia, Gasteizko taberna batean handikiro ospatu zuten bataioan. Paperik ezean, sarea erabiliko du sortzaileen mezuak hedatzeko, horretarako egokitu baitute www.eibar.org/blogak/volga helbide elektronikoa.

Proiektuak Volgako Batelariak du izena, erredakzio batzordeak tsarren garaiko literaturari eta kitsch irudiari dioten mirespenaren seinale. "Sobietar Batasuneko obraren izen ona hedatu zuten misiolariei ematen zitzaien izena da, eta baita XXI. mendeko kantu errusiar bat ere", argitu du Ibon Egañak

Argitalpenak idazleei egindako elkarrizketak plazaratuko ditu -horietako lehena Pello Lizarralderi egin diote eta sarean da jada- baita literatur kritika edo erreseinak ere. Eta hori da, agian, aldizkari klasikoekin duen antzekotasunik handiena. Gainerakoan, adierazpen librearen aldeko aldarria da. Adibidez, inoiz irakurri ez duten liburuen erreseinak argitaratzeko asmoa dute, aldez aurretik aitortuz irakurleari artikuluaren egileak liburuaren azala eta prentsan agertutako aipamenen bat edo beste besterik ez dituela irakurri. "Begiratuko dugu solapan jartzen duena, prentsan atera dena, Interneteko erreferentziak eta gure aurreiritziekin batera kritika egingo dugu", aurreratu du Egañak. Hori, Iban Zalduaren hitzetan, "oso praktika normala denez prentsan, guk egingo dugu, baina aitortua".

Atal horren azpian bada kritikarien zeharkako kritika; edo agian literaturari ematen zaio tratamenduaren aurkako deia. "Euskal literaturan maila berean daude Denboraren izerdia eta Zakurra, zure laguna. Guztiak dira liburu onak, eta kritikarik ezak hori sostengatzen du", argudiatu du Egañak.

Horrekin batera, inoiz idatziko ez luketena idazteko eskatuko diote aldizkaritik kanpoko hainbat kolaboratzileri. "Kanpoko jendeari dei egingo diegu eta eskubide osoa izango dute esateko testu hori ez dela beraiena", erantsi du Zalduak.

Behin hori guztia argituta, funtsezko galderari erantzun dio Ibon Egañak. Zer da Volgako Batelariak? "Koktel baten izena da, vodka, laranja zukua eta gerezi zaporeko brandya nahastuta egiten dena".