Hamlet eta Descartesen itzultzailea
Asteazkenean, otsailak 4, 35 urte beteko dira Bingen Ametzaga, erbesteko euskal kulturaren sustatzailea, Caracasen hil zela. Algortan jaio zen 1901ean, eta hamasei urtez, euskara ikasi zuen Campionen gramatikaz eta Lopez Mendizabalen hiztegiaz baliaturik. Valladoliden Zuzenbide ikasketak egin ondoren, euskal kulturaren alde lanean hasi zen, Euskal-Esnalea, Euzko Gogoa eta Egan aldizkarietan makina bat olerki, narrazio eta saiakera labur argitaratuz.
Errepublika garaian, Getxoko zinegotzi izan zen, eta Jaurlaritza eratu ondoren, Lenengo Mallako Irakaskintza-ko...
Asteazkenean, otsailak 4, 35 urte beteko dira Bingen Ametzaga, erbesteko euskal kulturaren sustatzailea, Caracasen hil zela. Algortan jaio zen 1901ean, eta hamasei urtez, euskara ikasi zuen Campionen gramatikaz eta Lopez Mendizabalen hiztegiaz baliaturik. Valladoliden Zuzenbide ikasketak egin ondoren, euskal kulturaren alde lanean hasi zen, Euskal-Esnalea, Euzko Gogoa eta Egan aldizkarietan makina bat olerki, narrazio eta saiakera labur argitaratuz.
Errepublika garaian, Getxoko zinegotzi izan zen, eta Jaurlaritza eratu ondoren, Lenengo Mallako Irakaskintza-ko zuzendari nagusi izendatu zuten. Kargu horretatik, Euzkadi'ko Ikastolak sortzeari ekin zion Plentzia, Orozko, Mundaka eta beste hainbat herritan.
Erbesteko lehen urteetan, Donibane Garaziko Euzko Aur-Etxea zuzendu zuen, eta Ingalaterratik pasatu ondoren, Argentina, Uruguai eta Venezuelan bizi izan zen. Montevideoko egonaldian, literatura unibertsaleko klasikoak euskaratzeari ekin zion buru-belarri: Zizeron, Boccacio, Descartes eta Wilde, beste batzuen artean. Bingen Ametzagari zor diogu Hamlet-en lehen euskal bertsioa, Buenos Aireseko Ekin argitaletxeak 1952an plazaratu zuena. Horrexen edizio digitala irakur daiteke www.susa-literatura.com/emailuak webgunean.
Danimarkako printzearen "izan ala ez izan" pentsaera horren ildotik, Uruguaiko Unibertsitatean atzerriko lehen euskal katedra sortu eta, Venezuelara iritsitakoan, XVIII mendeko agiriak arakatu zituen, Caracaseko Konpainia Gipuzkoarraren historia osatu arte.