"Este é o teu candidato, vota"
Óscar Otero fai parte do estudio de deseño A navalla suíza. Encargáronse de poñer a punto o videoblog de Anxo Quintana e fedellan na posta a punto da web de Edicións Xerais. Pero Otero aínda defende o cartel a xeito clásico. "Agora só xogan coa foto do candidato, o lema e logo do partido", di, "pero un cartaz é algo máis que os seus elementos obxectivos; debe ter unha función emotiva ou comunicar ideas". Para o deseñador, "hoxe en día concentran todo na cara do político e, na maioría dos casos podes trocar un lema por outro".
Hai tempo que as campañas políticas viraron en competi...
Óscar Otero fai parte do estudio de deseño A navalla suíza. Encargáronse de poñer a punto o videoblog de Anxo Quintana e fedellan na posta a punto da web de Edicións Xerais. Pero Otero aínda defende o cartel a xeito clásico. "Agora só xogan coa foto do candidato, o lema e logo do partido", di, "pero un cartaz é algo máis que os seus elementos obxectivos; debe ter unha función emotiva ou comunicar ideas". Para o deseñador, "hoxe en día concentran todo na cara do político e, na maioría dos casos podes trocar un lema por outro".
Hai tempo que as campañas políticas viraron en competición mercadotécnica e trátase de vender unha persoa. "O cartel é para que non penses, para que non sintas nada, apenas un 'este é o teu candidato, vota". Óscar Otero non ten reparo en citar a Luís Seoane, Castelao ou o propio Camilo Díaz Baliño, "eran máis artistas e iso nótase", e non estende a indixencia na materia alén do Padornelo. "En Colombia ou en Irán, o cartel político funciona, pero non chega aquí", explica, "mesmo o famoso afiche de Obama, que non é máis que unha fotografía vectorizada e coloreada, é tal".
Ao cabo, cumpriuse aquel prognóstico do ensaísta Walter Benjamin, segundo o que a reprodutibilidade técnica retiraba a aura da obra de arte e abrogaba, con carácter progresista, conceptos como "creación e xenialidade, perennidade e misterio". E, arestora, entraron na factoría dixital. "Cando non había tecnoloxía utilizábanse outros recursos, os debuxos con intención retranqueira, e todo iso perdeuse".