Homenaxe de escritores galegos a Sylvia Plath
Coincidindo coa chegada ás librarías da primeira tradución ao castelán da obra completa da poeta estadounidense Sylvia Plath, 20 representantes da cultura galega celebraron onte na Coruña unha homenaxe durante a que recitaron versos en galego da xenial escritora de vida tráxica. Baixo a batuta de Xoán Abeleira, autor desta tradución española da poesía completa de Plath, editada por Bartleby, xuntáronse escritores, profesores, dramaturgos, actores e pintores galegos para reivindicar a figura e a obra da poeta que en 1963 se suicidou en Londres á idade de 30 anos.
Mundialmente coñecida e ...
Coincidindo coa chegada ás librarías da primeira tradución ao castelán da obra completa da poeta estadounidense Sylvia Plath, 20 representantes da cultura galega celebraron onte na Coruña unha homenaxe durante a que recitaron versos en galego da xenial escritora de vida tráxica. Baixo a batuta de Xoán Abeleira, autor desta tradución española da poesía completa de Plath, editada por Bartleby, xuntáronse escritores, profesores, dramaturgos, actores e pintores galegos para reivindicar a figura e a obra da poeta que en 1963 se suicidou en Londres á idade de 30 anos.
Mundialmente coñecida e apreciada malia a súa fama de artista maldita, a Plath publicou poesía, prosa e ensaios, ademais de catro libros para nenos na súa curta aínda que prolífica vida. A súa poesía completa tan só fora traducida en Europa ao húngaro, antes de chegar agora a versión castelá. A edición na lingua de Miguel de Cervantes é a mesma que a publicada en 1981 polo seu ex compañeiro sentimental Ted Hughes, baixo o título de Collected poems.
Abeleira, quen tamén traduciu ao galego a escolma de 20 poemas recitados onte, completou a homenaxe cunha montaxe audiovisual para dar a coñecer cartas, postais e tamén a obra pictórica da poeta, gran amante de Matisse ou Klee, que lle inspiraron algúns textos. Exhibíronse na Coruña gravados, óleos e debuxos inéditos en España de Plath, quen tamén publicou no ano da súa morte A campá de cristal baixo o seudónimo de Victoria Lucas. A figura idealizada do seu pai, morto cando ela tiña só oito anos e ao pouco de publicar o seu primeiro poema, aparece constantemente nos seus debuxos. Unha gravación permitiu escoitar a voz de Plath.