Vigo acolle aos grandes mestres da pintura

Despois de pasar o Nadal en Compostela cunha excelente acollida de público, a xira dos clásicos da arte de todos os tempos recala no Centro Cultural de Novacaixagalicia en Vigo, onde, ata o vindeiro 20 de marzo, se pode visitar a mostra Colección Zanchi. Grandes Mestres. A exposición reúne 40 obras datadas entre os séculos XV e o XIX, procedentes dos fondos da colección privada formada polo empresario suízo Jean Zanchi, e continuada polos seus descendentes, que atesoura un catálogo inxente integrado por cerca dun milleiro de pezas adscritas ás correntes artísticas máis influíntes da art...

Despois de pasar o Nadal en Compostela cunha excelente acollida de público, a xira dos clásicos da arte de todos os tempos recala no Centro Cultural de Novacaixagalicia en Vigo, onde, ata o vindeiro 20 de marzo, se pode visitar a mostra Colección Zanchi. Grandes Mestres. A exposición reúne 40 obras datadas entre os séculos XV e o XIX, procedentes dos fondos da colección privada formada polo empresario suízo Jean Zanchi, e continuada polos seus descendentes, que atesoura un catálogo inxente integrado por cerca dun milleiro de pezas adscritas ás correntes artísticas máis influíntes da arte europea.

A excepcionalidade marca esta pinacoteca celosamente gardada no búnker dunha entidade bancaria e que só nunha ocasión anterior, hai 15 anos no Xapón, foi exhibida perante o público. O seu percorrido supón unha viaxe a través de cinco séculos por todo o continente, desde a Madonna de Andrea Mantegna até o romanticismo de Turner. A lección maxistral, que se presentará para escolares e familias mediante o habitual programa de actividades didácticas da Obra Social, abrangue outras xoias da escola italiana, como A incredulidade de Santo Tomás de Caravaggio, e a estrela da colección, Atropos, a única escultura de bronce coñecida de Miguelanxo.